Plie u myntri rangbah ba ar, ia ka jaka peitkai ka Syntu Ksiar

Jowai, 23 lyngkot:
U Prof. RC Laloo, Local MLA bad Deputy Chief Minister ka sorkar jylla, mynta ka sngi u la plie paidbah ia ka jaka peitkai (view point) ia ka wah Syntu Ksiar kaba dei ka bynta jong ka wah Myntdu.
Ha kane ka sngi la iadonlang ruh bad u Deputy CEM ka JHADC kum u Symbud Kongsan nalor kiwei kiwei de ki sahep sorkar bad ki dkhot jong ka Jaintia Fishing and Environment Protection Association (JF&EPA) kaba dei ka seng kaba la trei shitom ban pynitynnad ia katei ka jaka khamtam ha kaban pynneh ia ki jingim hapoh um bad sha ryngkew.
Lyngba ka jingiatreilang hapdeng ka JHADC bad ka JF&EPA ia katei ka jaka la dep ban pynbna paidbah kum ka jaka shong ki dohkha (Fish Sanctuary) ha kaba la khang ban kwai ha katei ka bynta jong ka wah Myntdu. Ia katei ka jaka peitkai la tei ha ka jinglut kaba 9.10 lakh tyngka. Na ka liang u Prof RC Laloo u la kular ban ai sa 12 lakh ban pynitynnad shuh shuh ia katei ka jaka.
Na ka liang ka JF&EPA ka la ai ia ka dorkhas sha u Prof Laloo ban kyrpad ia u ban pynioh haduh 16.76 lakh tyngka na ka bynta ban shna surok bad footpath ha katei ka jaka. Na ka liang utei u Myntri u la kular ban ai 12 lakh kaba sah nangta pat u la kyntu ia ka JF&EPA ba kan wad hi ka lad ka lynti ban pyndap ia kaba duna.
Na ka liang u ma A. Andrew Chullai, Dy. CEM ka JHADC u la ong ba hadien ba ka JF&EPA ka la wan ban tyrwa sha ka District Council ban pynbna ia katei ka jaka kum ka jaka shong ba kyrpang ki dohkha, ka JHADC mynta kala iaid shakhmat ban bud ia katei ka nuksa ha kaba kan sa pynbha bun tylli ki jaka shong ba kyrpang ki dohkha ha ki wah bapher bapher jong ka Jaintia Hills. Kiwei pat kiba la ai jingkren ha ka jingialang plie ia katei ka jaka, ki long u ma SK Lato, ma Jait-da-O Sumer bad kiwei kiwei.