Nongpoh:U Bah Lahkmen Rymbui, Myntri ka tnat pule puthi jong ka sorkar jylla, hynnin ka sngi Saitjian u la hiar sha shnong Pillang kata, ka shnong kaba don ha khappud ka Meghalaya-Assam, kata na ka bynta ban leit plie paidbah ia ka building ka Pillang kata Secondary School.
Ia ka Building jong katei ka skul, la tei lyngba ka jingiarap bei tyngka na ka Asian Development Bank (ADB) bad kaba la iarap ban kyrshan da ka Human Capital Development Meghalaya, ia katei ka skul Building la tei ha kata ka rukom kaba bha bad kaba janai bha, na ka bynta ka jingdonkam ki khynnah skul, kata katkum ka juk thymmai ba mynta.
La sdang ban tei ia katei ka skul ha u snem 2019 bad tang hapoh shisnem kata ha u 2020, la lah ban pyndep lut baroh, ka jinglut na ka bynta ban tei ia ka Building jong katei ka skul ka la kot sha ka T. 3 klur tam.
Nalor u Myntri sorkar, kiba la donlang ha katei ka sngi, ki kynthup ia u Bah Sosthenes Sohtun, MLA Jirang, u Bah Victor Rani, MDC Jirang, u Bah N. Lamare, SP Ri Bhoi, ka Kong B. Hynniewta, ADC Ri Bhoi lem bad kiwei.
Kiba la ai jingkren ha katei ka sngi, naduh u Bah Lahkmen Rymbui, u Bah Sosthenes Sohtun lem bad kiwei, ki la ong ba ka jingioh ban plie ia katei ka Building, kan da long shisha ka jingkmen kaba khraw ia ka shnong lem bad ki shnong ba marjan jong katei ka thain hi baroh kawei bad khamtam eh ba katei ka thain ka iajan eh bad ka Assam.
U Bah Sosthenes Sohtun, u la ong ba katei ka skul kan sa ai jingmyntoi ia kumba 15 tylli ei ei ki shnong kiba ha katei ka thain, kaba dei ruh ka thain kaba don ha syndah eh bad ka Assam, namarkata u MLA u la kyntu ia ki nongpyniaid bad ia ki paidbah ba kin sumar bha ia katei ka skul, khnang ba kan long kaba neh bad ka ban ai jingmyntoi ia ki paidbah katei ka thain.
U Bah Lahkmen Rymbui, u la kyntu ia ki khynnah skul ba ki dei ban long kiba trei shitom bad minot thop ha ki jingpule ka jong ki bad ba ki dei ruh ban don ia kata ka thong ban kiew shaphrang, khnang ba kan long ka jingmyntoi ia ki hi hadien habud.
Phi don ban ong eiei?