Plie U Mukul ia u mawnongrim ba T. 8.9 klur ka Hostel kynthei

Shillong, 10 Nailur:
U Myntri Rangbah ka jylla u Dr Mukul Sang ma u la buh ia u maw nongrim ba T.8.9 klur na ka bynta ban tei ia ka jaka sah hostel ki kynthei ka KJP Synod ha Dinam Hall, Jaiaw mynta ka sngi Balang. Ha kane ka sngi, kum ka dak ka jingsdang, u Myntri Rangbah u la aiti ruh ia ka kot pisa (cheque) kaba T. 1.5 sha u Senior Administrative Secretary ka Synod u Pastor NS Phawa.
Ia kane ka jaka sah ne hostel jong ki kynthei yn tei na ka 8th Plan Special Assistance Scheme bad yn pyndep hapoh 24 bnai kaba mut ar snem. Ha kane ka hostel, yn tei kat kum ka jingdonkam ba biang bad yn ngiam haduh 300 ngut ki ban sah ha ka.
Haba kren ha kane ka sngi, u Myntri Rang bah u la ong pynpaw ia ka jingsngew tynnad namar ba ka KJP Synod ka la iadon bynta bad ka sorkar ban trei na ka bynta ki kam shakri ia ki paidbah ban kyntiew ia ka ioh ka kot ha ka jylla.
U la ong ba ka jingtrei jong ka sorkar kam mut ban pynbiang ia ki jingdonkam ha sor hynrei kaba kongsan ruh ka long ban pynroi sha ki nong kyndong khnang ba ki briew kin nym wan sha sor. U la ong ba ka sorkar ka la thaw ia ki district ym da ka buit politik, hynrei namar ka dei ka jingdonkam jong ki paidbah ban plie ia ki lad sha ki nongkyndong.
Shwa ia kane, ka myntri ka tnad Social Welfare ka Deborah Marak ka la iaroh ia ka jingtrei jong u Myntri Rangbah uba la lah ban pynrulong ia kane ka projek kaba donkam. Ka la ong ba lyngba ka roi ka par sha ki nongkyndong kan khang lad ia ki briew ban shu wan kiew sha sor.
Katba ka myntri tnad kam pohiing ka Kong Roshan Warjri ka la ai khublei ia u Myntri Rangbah uba la wanrah ia kane ka projek ha ka konstitwensi jongka bad ka la kyrmen ba ka KJP Synod kan pynlah ban shakri kham bha lyngba ka jingdon jong kane ka hostel ban ai sha kito kiba donkam shisha.
Na ka liang u director ka Social Welfare u Bah Hima Shangpliang u la ong ba ka sorkar kan tei ar tylli ki hostel ia ki kynthei kawei ha Shillong bad kawei pat ha Tura.
Katba u Pastor DS Sohkhlet uba dei u moderator ka KJP Assembly u la iathuh ba la seng ia kane ka hostel ha u snem 1986 bad ka ngiam tang 95 ngut ki kynthei ban sah bad ia ka jingthmu ban pynheh ia kane la mih jngmut bad ka jingplie ia u mawnongrim mynta ka la urlong ban shna ia ka hostel ban ngiam 300 ngut.