Plie U Mukul ia ka Raksamgre Civil Sub-Division

Shillong, 24 Iaiong:
U myntri rangbah ka jylla u Dr.Mukul Sangma u la plie paidbah ia ka Raksamgre Civil Sub-Division ha ka jingialang kaba la wan ban ia shim bynta kumba 5000 ngut ki paidbah ha madan Raksamgre.Ha katei ka jingialang la donlang u myntri ka tnad pohing ka sorkar jylla u bah HDR Lyngdoh, u myntri ka tnad ialehkai u Zenith Sangma, u Parliamentary Secretary u Limison D Sangma, Brigady N Marak, Michael T. Sangma, Cherak W. Momin, Noverfield Marak, Samuel M. Sangma and Sengnam Marak, Chairperson, State Development Reforms Commission Bluebell R. Sangma, DGP Dr. S.B. Singh, IGP Western Range, Mukesh Kr. Singh, West Garo Hills Deputy Commissioner i/c D.D.Shira, SDO Civil, Dadenggre Ram Kumar ki ophisar sorkar, ki nongsynshar shnong, ki khynnah skul bad ki dkhot jong ka Raksamgre Civil Sub-Division Demand Committee.
Haba kren ha katei ka jingialang u Dr.Mukul u la ong ba ka Raksamgre ka de ihok ban ioh ia ka Civil Sub Division namarba ka la jngai palat na sor Tura bad ka la pynkhapngiah bad pynjynjar ruh ia ka Dadenggre Civil Sub-Division, namar ka jingbun briew katei ka thaiñ.
U la kdew ia ka jingroi sted ka jylla ha kine ki 7 snem mynta da kaba kdew ia ki kam pynroi kiba bun jait jong ka sorkar. U la ong ba ka jylla Meghalaya ka la kiew sted haba ia nujor bad kiwei pat ki jylla bad u la buh thong ha hapoh 15 haduh 18 snem kane ka jylla kan dei ka jylla kaba bit ba biang.
Ha katei ka jingialang u Dr.Mukul u la pynkup burom ia ki 3 ngut ki Nokma kiba la ai sngew bha ia ka jaka ban thaw ia ka Civil Sub-Division thymmai. U la plie ruh ia u maw nongrim jong ka District Seed Multiplication Farm jong ka Agriculture Napakgre bad u maw nongrim ban thaw ia ka Community Multi-Facility Centre kaba hap hapoh ka Special Plan Assistance -Border Areas Development Programme.
U Commissioner& Secretary, Home, E.P Kharbhih u la pule ia ka jingpynbna ia ka CSD thymmai ka ban kynthup ia ki shnong kiba hap hapoh ka Tikrikilla bad Dadenggre C&RD blocks bad 8 tylli na Resubelpara block. Ia ka jingpynbna ka sorkar la aiti sha u ADC in-charge jong katei ka Civil Sub-Division, u Labenstone Ch. Marak, u ban iarap lang da EAC, Rosalind D. Shira.