Plie u Mukul ia ka ophis PHE ha Mairang

Shillong, 18 Risaw:
U Myntri Rangbah ka jylla u Mukul Sangma ha kane ka sngi Saitjain u la plie thymmai ia ka ophis ka PHE u Executive Engineer (PHE) Mairang Sub Division. Ha katei ka sngi ba plie ia ka ophis PHE la don lang ryngkat da u bah Metbah Lyngdoh uba long u MLA ka Mairang konstitwensi, u bah G. Wahlang u MDC bad u bah PM. Syiemlieh u Syiem ka Hima Nongkhlaw  bad kiwei de.
Haba kren ha kane ka sngi u Mukul u long ba kane ka ophis ka la ioh ban pynieng ha ka jaka ba biang bha bad kane kan iarap ia ka tnad ba kan trei bha na bynta ki paidbah kane ka ne ka thain.
U la ong ba ka Mairang kadei kawei na ki shnong ba la kyrkhu  lyngba ka jingdon ka spah mariang  bad u la kyntu ia ki paidbah ba kidei ban pyndonkam bha bad kidei ban iada ban sumar ia ka mariang.
Shuh shuh u la ong ruh ba ka Mairang kadei ka jaka ba tynnad bad ka lah ban long kum kawei na ki jaka jngohkai pyrthei.
U ngeit ba na ka liang ka tnad kan ai ka jingshakri kaba biang na bynta ki paidbah kane ka shnong ha kaba iadei bad ka um bam um dih. U la ong ba ka jingshna ia ka surok na Mairang sha Ranigodown yn pyndep ha u bnai Nohprah.
Ia ka prokram la pyniaid da u bah S K Sun u Chief Engineer ka PHE. Kiwei kiba ai jingkren ha kane ka sngi ki long u bah Metbah Lyngdoh u  MLA ka Mairang, u bah G Wahlang u MDC bad u bah PM. Syiemlieh u Syiem ka Hima Nongkhlaw.