Plie U Mukul ia ka HADR ha EAC

Shillong, 6 Jylliew:
U Myntri Rangbah kajylla u Dr Mukul Sangma u la plie ia ka Humanitarian Assistance and Disaster Relief (HADR) Exercise, Nabhas Rahat 2017 mynta ka sngi ha Eastern Air Command (EAC), ki shipai suin ha Upper Shillong.
Haba kren ha kane ka sngi, u Dr Mukul u la iaroh ia ki shipai suin na ka bynta ba pynlong ia kane ka jinghikai ban iada na ka jingma na ka jingjia ka mariang ha kaba ka sorkar jylla ka la kmen ban ioh iashim bynta ha kane ka jingiathir.
U la ong ba ka jingpynkhreh ban iada ia ka jingma na ka jingjulor na ka bor ka mariang bad kiwei ki jingjia, ka dei kaba la pyrshang da ka sorkar la katto katne por na ka jingshem ba shakhmat. U la ong ba ka sorkar jylla ka la lah ban lum thup ia ka State Disaster Management Plan bad kan long kaba biang eh ban iashim bynta ha kane ka HADR.
U la ong ba naduh ba khie u jumai bah ha jylla ha ka 12 tarik Jylliew1897, ka la wanrah ia ka jingkyndit ia ki briew ha ka dong mihngi bad ki la sngewthuh ia ka jingdonkam ban iada na kum kane ka jingjia.
Ha kane ka jingiatai kaba lai sngi la pynlong da ka jingiatreilang ka Disaster Risk Reduction (DDR) bad ka Relief and Rehabilitation. Ka Indian Air Force (IAF) ka la dei kaba nyngkon ha ka jingiarap ban ai sha ki paidbah haba don kano kano ka jingjia ne ka Humanitarian Assistance and Disaster Relief (HADR) ha India.
Ha kane ka jingiathir la wan iashim bynta da ki nongmihkhmat na ka NDMA, NDRF, CRPF, BSF, Air HQ, Indian Army, Indian Navy, DGAR, GTC, ARC, Central Police bad ki ophisar jong ki tnad sorkar jylla Meghalaya. La don lang u Air Marshall, Anil Khosla ka EAC, Shillong bad u Major General V K Datta (Retd).