Nongpoh: Ka la long ka jingkmen kaba khraw ia ki kmie ki kpa bad khamtam eh ia ki khun samla pule, ha kaba hynnin ka sngi ka Eastern Ri Bhoi College, kaba don ha Sohraman, Bhoirymbong, ka la ioh ban pynheh ia katei ka Kolej, da kaba plie paidbah ia ki kamra klass ba thymmai jong katei ka Kolej.
Ia kitei ki kamra thymmai jong katei ka Kolej, la tei lyngba ka jingiarap na ka Special Assistance Scheme 2015/2016 ka KHADC, ia kaba ka la pynmang haduh T. 10 lak, na ka bynta ban shna ia kitei ki kamra klas ha katei ka Kolej.
Ha kaba plie paidbah ia kitei ki kamra klas ba thymmai ha katei ka Kolej, la sakhi da ka jingdon u Bah George B. Lyngdoh, MLA ka Umroi kum u kongsan, nangta u Bah PN. Syiem, chairman ka KHADC, ki Nonghikai, ki samla pule lem bad ki riew rangbah jong katei ka thain.
Ha kane ka sngi, ki la don ki nongpyniaid jong katei ka Kolej kiba la ai jingkren bad kaba kham sngewphylla ka long, ba wat haba ki la ioh ban plie paidbah ia kitei ki kamra klas, hynrei ki la pynpaw pat ia ka jingsngewkhia kaba jur, namar ba ki la iakynduh ia ki jingeh kiba laiphewjait, haba ki pyniaid ia katei ka Kolej bad kata ka dei, namar ba ym shem la don ki Nongmihkhmat kiba la shimkhia ban kyntiew ia katei ka Kolej, kaba dei ruh tang ma ka kaba la ai jinghikai ia ki samla pule ha katei ka thain.
La ioh ruh ia ka jingkren na u Bah PN Syiem, ha kaba u la pynpaw ia ka jingkmen ban iohi ba kitei ki kam klas jong katei ka Kolej, la pyntrei beit ha kata ka rukom kaba biang, katkum ba la pynmang ban trei.
U la iathuh ruh, ba ka jingurlong jong katei ka Kolej ban ioh ia kitei ki kamra klas ba thymmai, ka dei ha ka por kaba u Bah PN Syiem, u long kum u CEM hapoh ka KHADC, ha haba u la ong ruh ba u sngewkhia eh halor jingduna hapoh katei ka Kolej, kaba la pynlong ia u ba un shimkhia bad ban pynioh ia katei ka skim, na ka bynta ban pynbun shuh shuh kim kamra klas ha katei ka Kolej.
Katba na ka liang u Bah George B. Lyngdoh, u la ong ba katei ka thian ka la donkam shisha ban don ia ki Kolej kiba biang, namar ba ka la dei lypa ka thain kaba bun ki shnong bad kaba la bun ruh ki samla pule, namarkata lada don ki jaka pule kiba biang, kan iarap ia kito ki samla pule kiba kwah ban pule kham shalor bad kaba kham iarap eh ka dei ia kito kiba wan na ki longiing longsem kiba duna ka ioh ka kot.
Haba iadei bad katei ka Eastern Ri Bhoi College, u Bah George B. Lyngdoh, u la ong ba un sa shimkhia ban iakren sha ka sorkar, na ka bynta ban pynbiang ia shibun ki jingdonkam hapoh katei ka Kolej bad khamtam eh ban pyniaryngkat kumba long lem kiwei pat ki Kolej kiba don ha kiwei ki jaka hapoh ka jylla.
Kum ka thain kaba la don haduh 200 tam tylli ki skul, ka la dei ban don pat kawei ka Kolej kaba khambiang, ong u Bah George B. Lyngdoh. Namarkata u la kyntu ia ki nongpyniaid ki Nonghikai, ki riew rangbah ba kin Iatreilang bad u, khnang ba katei ka jingthmu ban wanrah ia ka jingkylla bad ban kyntiew ia katei ka Kolej kan urlong, u la bynrap.
Phi don ban ong eiei?