Plie U MLA, ia ka jaka pynkha khyllung bad sumar longkmie armet ha Umroi

Nongpoh: Ka Umroi Health & Wellness Centre, ka jaka sumar kaba don ha shnong Umroi, mynhynnin ka la sngi la ioh ban plie paidbah ia ka (Labour Room & Maternity Ward) ne ka jaka pynkha khyllung bad ka jaka sumar ia ki longkmie ba armet.

Ia katei ka jaka pynkha khyllung, la wan ban plie paidbah da u Damanbait Lamare, MLA ka Umroi Constituency, ha ryngkat ka jingdon u Bah Rangkynsai Kharbuki, MDC Umroi, u Arpit Upadhyay Deputy Commissioner Ri Bhoi, u Manish Kumar ADC Ri Bhoi, ka Dr. T. S Momin DM&HO Nongpoh, u Bah u Bah P.B Sylliang Chairam Umroi Dorbar Pyllun, ka Kong Mebariskem Shangpliang Project Coordinator SELCO Foundation lem bad kiwei.

Katei ka jingurlong jong katei ka jaka pynkha khun hapoh katei ka jaka sumar, ka dei ruh lyngba ka SELCO Foundation, ka seng trei mon sngewbha kaba la dep ruh ban soi ia ka soskular Memorandum of Understanding (MoU) bad ki bor District ka Ri Bhoi na ka bynta ban tei ia ki Heath Sub Centre kiba dei katkum ka juk stad ba mynta.

Katei ka SELCO Foundation, ka dei ruh kaba iatreilang bad ka sorkar jylla lyngba ka Aspirational District Program NITI AYOG, kata ka long ban sumar ia ki longkmie armet bad ki khynnah rit katkum ka juk stad ba mynta bad khnang ban nym shah ktah ha ka por ba kha khyllung bad ban pynkhlain ia ka jingsumar ba kyrpang na ka bynta ki khynnah rit.