Plie U MLA ia ka ing skul thymmai ka Saitsohphlang

Nongstoin, 14 Iaiong:
Mynta ka sngi U MLA/MDC ka Rambrai u bah K.P. Pangniang u la plie paidbah ia ka iing skul ba thymmai jong ka skul Saitsohphlang Public L.P. School Nongspung ha ryngkat ka jingiadonlang jong u MDC ka Nongstoin bah LG Nongsiej, u bah V. Swer BDO ka Nong stoin Block, B. Nongsiej Sordar Shnong Nong spung ki dkhot jong ka MC, ki Nonghikai ki kmie ki kpa ki khynnah skul lem bad kiwei kiwei de.
Ha katei ka sngi la pule lyngkot ia ka khana shaphang katei ka skul naduh ba la seng ia ka da u Secretary jong ka MC u Bah K. Nongsiej ha kaba u la iathuh ba ia katei ka skul la seng da u bah P. Thabah ha u snem 1991 bad hadien katto katne por la sangeh noh na kiba bun ki daw bym biang bad ha u snem 2003 la pyniaid noh da ka bor Shnong. Ha u snem 2007 ka skul ka la ioh ka jingiarap na ka SSA ha kaba iadei bad ka jingsiew ia ka tulop sha ki Nonghikai bad dei ha u snem 2013 ka skul kala duh noh ia ka jingiarap na ka SSA bad tad haduh mynta ka skul kam shym la ioh jingiarap shuh na ka SSA, hynrei la shu noh synniang da ka Shnong ban siew ia ka tulop sha ki Nonghikai. U bah KP Pangniang haba ai jingkren kum u kongsan u la ong ba ka dawai ba lah ban pynkoit bad rat dyngkhong ia ka jingsahdien bad jingbiej dei tang ka jingnang jingstad, u la ong ruh ba ban lah pynia ryngkat dor ia u nongkyndong bad u nongsor ka dei tang ka jingnang jingstad bad ka jingduk kam dei ban long ka daw jong ka jingkhanglad ia ngi ba ngin nang ngin stad lada ngi trei shitom bad minot thop. U Kongsan u la ai ka jingiaroh kaba kyrpang ia u Ma Hoping Stone Lyngdoh u ba la noh jingiarap sha kane ka skul T.3 lak tyngda lyngba ki MLA skhim bad kumjuh ruh ia ki nonghikai jong katei ka skul kiba la aiti met bad mynsiem ban shna bad pynwan dur ia ka lawei ba phyrnai jong ki khynnah skul. U kongsan  u la kyntu ruh ia ki kmie ki kpa ba kin iatreilang bad ki nonghikai khnang ba ka lawei jong ki khynnah kan long kaba phyrnai u la ong ruh ba kane ka skul kan ym kut noh tang hangne bad tang katne hynrei ngin iai bteng ka jingiatreilang khnang ba ngin lah ban kyntiew ia kane ka skul kham sha jrong bad ban ia ryngkat kyrdan lem bad kiwei kiwei ki skul kiba don ha Sor Nongstoin.