Plie u Lat ia ka tamasa ki samla NSS ha Shillong

Shillong, 07 K’lyngkot:
U Lat ka jylla u la plie ia ka tamsa jong ki samla National Service Scheme (NSS) ha nongbah Shil long hynne ka sngi Hat majai. Ia kane ka tamasa la pynlong na ka bynta ki samla ba dei na ka jylla shatei lammihngi ka ri ba la pynbeit da ka tnad Higher and Technical Education, jong ka NSS Cell, Meghalaya ha Soso Tham Auditorium.
Haba kren ha kane ka jingialang plie, u Lat u la ong ba ka ka long kaba sngew tynnad ba ka jylla Meghalaya kan ioh ban pynlong ia kane ka tamasa jong ki samla na ka bynta ban saindur ia ki samla ban trei ha ki kam imlang sahlang. Ym tang katta, kan long ruh ka jingialum lang jong ki samla ban wanrah ia ka jinglong kawei, ka jingsngew shipara, bad ban pynneh ia ka jingsngew iajan hapdeng ki jait bynriew bad nongshong shnong bapher bapher jong kane ka thain shatei lammihngi ka ri.
U la ong ba donkam ban kynshew ia ka spah na ka bynta ban pyndonkam ia ka sap jong ki samla namar ba ki samla ki dei ka lawei jong ka ri bad ka jaitbynriew.
U la ong ba ka NSS ka la leh ia kaba donkam ban pynshut ia ki samla ka ri bad ka thain ba kin tei ia ka longbriew manbriew, ka jinglong shimet jongki ha ki jingim ban sa wan. U la ong ba ki samla kim dei ban pyrkhat da kumwei haba ki iakynduh ia ki jingeh hynrei ban shim ia ki jingeh kum ka lad ba kin thaw ban kiew ha ka jingim.
Ha kane ka sngi, u la pynlait ruh ia ka kot sah kynmaw ka NSS bad la synrang lang u Symbud Myntri Rangbah ka jylla u Prof RC Laloo, u Nodal officer ka NSS u CCM Mihsil, u Sunil Basumatry u Youth Officer ka NSS North East Region bad u State Liason officer ka NSS u Bah H Iangrai u la khublei ia baroh kiba wan ban iadon bynta ha kane ka tamasa ban kut saw sngi kynthih.