Plie u Conrad ia ka iing skul thymmai ba pynkha ka Synod

Shillong: Mynta ka sngi, u Myntri rangbah ka jylla, u Conrad K Sangma u la plie ia ka jingtei ba thymmai ka skul Synod Higher Secondary School, Mission Compound, Shillong ba la shna na ka skhim Supporting Human Capital Development, Meghalaya lyngba ka pisa ba la bei da ka Asian Development Bank (ADB).

Ia kane ka iing skul thymmai ba la pynkha la tei ha ka jingmang pisa kaba T. 3 klur tam eiei.
Haba kren ha kane sngi, u Conrad u la ong ba ka long ka jingkmen ban plie ia kane ka jingtei ka skul kaba la ai ka jingshakri kaba jrong ha ka jylla ha ka pule puthi. U la ong ba na kane ka skhim ba la bei pisa ka ADB, ki don 62 tylli ki skul kiba la dep ban shna bad sa 65 tylli kiba dang iaid ka jingtrei shaid shaid ha kylleng ki bynta jong ka jylla.
U la ong ba namar ba kane ka skhim ka treikam bha, kane ka sorkar ba mynta ka la rai ban bteng ban pyntreikam sa ia ka bynta kaba ar.
U la ong ba kane ka skhim, ym tang ban shna ia ki iing skul hynrei la ai jingpyntbit ruh ia ki nonghikai, ia ki jingdonkam ha ki skul, bad kumjuh ka la ai jinghikai ia ki samla ha ka seng kam seng jam khnang ba kin nang ban ieng ha la kijong ki kjat.
U myntri rangbah u la ong ba ka jingroi ka longbriew manbriew ka dei kaba kongsan ha kaba ka sorkar kala rai ban iaid ha ka bynta kaba ar jong kane ka projek.
Ha kane ka sngi ka bor pyniaid ka KJP skul, ka la pynkyndit ia u myntri rangbah hadien ba u chairman ka managing committee u Pastor WC Khongwir u la pynbna ba ia mynta, ka skul kam kwah ban ai dorkhas ne mat jingdawa, hynrei ka kwah ban ai ka jingnoh synniang sha ka sorkar na ka bynta ki lanot shlei um ha Garo Hills.
Shwa ia kane, la ioh ia ka jingkren na u MLA ka thain u bah Adelbert Nongrum, na ka MLA bad myntri sorkar barim kong Roshan Warjri.
Ha kane ka jingialang la pyniaid da u chairman ka Managing Committee ka skul u Pastor WC Khongwir, ba la don ka Principal A Phira, ki nonghikai.
La pynshong shit ia kane ka jingialang da ka jingrwai bad ka jingshad na ki khynnah skul kiba rit bad kiba la kham heh ruh kumjuh nalor ka jingrwai na ki nonghikai.