Plie u CEM ka KHADC, ia ka iingbishar jong ka KHADC ha Nongpoh

U CEM ha ryngkat ki EM ha ka sngi ba plie paidbah ia ka Iingbishar ka KHADC ha Nongpoh

Nongpoh: U Bah Titosstarwell Chyne, Chief Executive Member jong ka Khasi Hills Autonomus District Council (KHADC), ha ryngkat ka jingdon ki EM na ki tnad treikam bapher bapher hapoh ka KHADC, mynhynnin ka sngi, ki la leit ban plie paidbah ia ka Iingbishar jong ka KHADC kaba don ha Nongpoh.

Ha katei ka sngi ba la plie paidbah ia katei ka Iingbishar jong ka KHADC, nalor ka jingdon u CEM ka KHADC, la sakhi da ka jingdon u Bah Lamphrang Blah, Chairman ka KHADC, nangta kiwei ki EM kiba kynthup ia u Bah Teibor Pathaw, u Bah Victor Rani, ka Kong Grace Kharpuri, u Bah Balajied Rani, MDC Nongpoh lem bad kiwei.

Haba iadei bad katei ka jingurlong jong katei ka Iingbishar ka KHADC, na ka liang ki nongai jingkren ha katei ka sngi, ki la pynpaw ba baroh ka jingurlong jong katei ka Iingbishar ka KHADC, ka dei lyngba ka jingtrei shitom da u Bah Balajied Rani, namar uba la iai buddien shi buddien halor katei ka kam, tad haduh ba kan da urlong shisha.

Haba shim kyllum ia ka jingkren na u CEM lem bad ki EM ka KHADC, ki la ong ba ka jinglah ban plie ia katei ka Iingbishar ka KHADC, kan da long shisha ka jingmyntoi ia ki paidbah ka thain Nongpoh lem bad ia ki paidbah ka Ri Bhoi hi baroh kawei, namar ia kiba bun ki kam mukotduma hapdeng ki Khasi para Khasi, kin lah ban ioh ia ka jingbishar bad ia pynbeit hapoh katei ka Iingbishar.