Plie U CEM ia ka jingkieng ba T.20 lak ha Mawphlang

Mawphlang, 28 Lber:
U Chief Executive Member ka KHADC u bah Pynshngaiñ N Syiem u la plie paidbah mynta ka sngi ia ka jingkieng doi doi kaba don ha ka shnong tynrai ha Mawphlang. Katei ka jingkieng doi doi ka dei kaba la pyntrei hi da ka KHADC ha ka jinglut kaba T.20 lak tyngka na ka bynta ban pynitynnad bad ban khring ia ki paidbah na kylleng ki jaka ha ka tamasa Maw bynna ka ban sdang naduh ka 31 tarik u lber 2016 ha katei ka shnong Tynrai ha Mawphlang. La synran ia u bah Pynshngaiñ da kiba bun ki MDC jong ka KHADC.
U bah Pynshngaiñ u la ong ba ia katei ka jingkieng yn dang pynbha bad pynitynnad shuh shuh ha kaba yn pynwandur ia ka ha ka dur jong ka jingkieng jri. La sdang ban tei ia ka katei ka jingkieng ha ka 25 tarik u rymphang bad la pyndep pat ha ka 27 tarik u lber kaba long tang kumba shibnai tam ne duna.
Hadien ba la plie ia katei ka jingkieng u bah Antonio War EM jong ka tnad Arts and Culture u la ong ba ha katei ka tamasa kin don bunjait ki prokram naduh ka ki jingiakob bapher bapher kum ka jingialehkai Ramdos, ka jingialeh maw point,ka jingiakob sum khnam bad ka jingiakob siat khnam hapdeng ki Hima baroh khoit. U la ong ruh ba ha katei ka sngi kiba bun hi ki prokram ki dei kiba la kham pynleit jingmut ha ka liang ka pule puthi namar ba kin don haduh 26 tylli ki skul ban ia shim bynta. Nalor kiwei pat ki nongshah khot sngewbha u bah Antonio War u la ong ba ka kynhun riewlum na Australia kaba la tip kum ka Nuragunyio ka la pynthikna ba kan donlang ha katei ka sngi.