Plie U bah Sanbor Shullai ia ka iingskul ba thymmai jong ka Laban Bengalee Boys Higher Secondary School

Shillong: U Assistant Executive Engineer jong ka PWD Building u bah D Tariang, u la aiti ia ki kot sha u President jong ka Laban Bengalee Boys Higher Secondary School u SK Changopadhya hadien ba la dep ban pyndep ia ka jingtrei ia ka iing skul ba thymmai. Ia kane ka iing skul ka ba dang shna thymmai la bei pisa lyngba ka Asian Development Bank ha ka jinglut kaba la kot T.1.83 klur.

Ia kane ka jingialang la pynlong ha poh katei ka skul ha ryng kat ka jingiadon lang u MLA jong ka thain u bah Sanbor Shullai, u ba la trei shitom ban pynioh ia kane ka jingbei pisa na ka sorkar jylla.

Na ka liang u bah Sanbor Shullai, ha ba ai jingkren ha kane ka sngi u la pynpaw ia ka jingsngewnguh ia ka sorkar jong u Dr Mukul Sangma namar dei ha u snem 2018 la ioh ia ka jingmang pisa na ka bynta kane ka ing skul bad kum juh ruh ia kane ka sorkar jong u Conrad K Sangma kaba la shim khia ban pyndep ia kane ka jingtrei ha ka por kaba biang.

U bah Sanbor u la iathuh ba ia kane ka iing skul thymmai la ioh ia ka jingiarap lyngba ka skhim jong ka ADB, ha ka ba la don bun ki jingeh ha ka ba sdang hynrei u la lah ban pynsngewthuh ia ki bor sorkar ha kito ki snem bad la ioh ia ka jingmang pisa bad mynta ka sngi la ioh ban plie ia ka.

U la ong ruh ba kane ka skul ka dei ka skul ka ba la ailad ia ki long iing kiba duk ba rangli ba kin ioh ban pule ha kane ka skul bad kane ka skul kala lah ban pynpaw ia lade da ka jingpass bha jong ki khynnah ki eksamin jong ki bad kane ka dei ka jingtrei shitiom jong ki nonghikai.

U President ka skul u S K Changopadhya,u la iathuh ba ka jingangnud jong ki nong pyniaid ia kane skul ban ioh ia ka iing skul ka biang ia ki khynnah ka dei kaba la slem, kum ki nongpyniad kila leit sha NEC, ki la leit sha u MP u bah Vincent H Pala ban ioh jingiarap hynrei ki la sep ei ka jingpyrshang.Ha dien ba ki la kut ki lad ki la leit ban ia kynduh ia u MLA jong ki u Bah Sanbor Shullai bad ha kaba nyngkong u la shu ong buh ia ki kot ki sla un sa peit, namar ka jingshim khia ka jong ban kyntiew ia ka pule puthi la ioh ka lad ban pynrung ia kane ka iing skul kaba thymmai na ka skhim ADB ia kaba ki la ioh ban plie mynta ka sngi.