Jowai, 17 ’lyngkot:
U Chairman ka PAC (Public Account Committee) jong ka state Assembly, u bah Paul Lyngdoh, uba dei ruh u MLA ka Shillong West mynta ka sngi u la plie pyrda iaka jingrakhe lyngkhuh snem kaba 75 snem ka Dorbar Shnong Ladthadlaboh, Jowai.
Haba kren kum u kongsan u bah Paul lyngdoh u la ong ba ka jingiatreilang ha ka imlang ka sahlang kum shi paradoh parasnam ha ka imlang ka sahlang kan kyntiew ia ka jaitbynriew. “Ka long kaba sngew sarong ba ka jait bynriew Khasi Pnar kadei ka jaitbynriew kaba khlainbha ka jingiatreilang ha kiba bun ki kam.
Ia ka shnong Ladthadlaboh la seng da ki 12 ngut kynthup ia ki rangbah bad ki longkmie, u bah Paul u la ong ba baroh ki kam kiba khraw ki dang tang na ki katto katne ngut. “Wat ia ka USA ruh la sdang ia ka jingialeh laitluid tang da ki 50 ngut eiei ki riew iohi jngai haduh ba ka la long ka ri kaba khraw bad khlainbor tam ha ka pyrthei”, u la ong.
Haba kren halor ka jingiaid lynti katei ka shnong ha ki 75 snem, u bah Pual u la ong ba kadei jingiaid lynti kaba khohruh khohram. “Tang kiba lah ban iaid lyngba ki jingeh kiba bun jait kiba lah ban poi sha ka thong (the Best Sailor comes from the stormiest of the Seas) la ong u bah Paul. U la ong ruh ba dei tang kiba shim ia ka jingkitkhlieh kaba pura kiba lah ban jop lut ia ki jingshah kynnoh ba har rukom bad ki jingshah kynthoh ba bun jait.
Utei u nongmih khmat u la bynniaw ruh halor ka jingkynriew ki jingsniew ha ki shnong ki thaw khamtam ha kaba iadei bad ka jingkyrni ha u Drugs. U la ong ba kum ki nongialam shnong, ki nongshong shnong ki dei ban pyrkhat ba maki ki kham khraw ban ia ki jingsniew baroh, ym ki jingsniew, khnang ban dup lah ban pynjot ia kitei ki jingsniew kiba lynshop ia ka imlang ka sahlang.
U bah Paul u la iaroh ruh ia ka jingiatreilang bad ka jingiatylli ki nongshong Shnong Khasi Pnar. U la ong ba ka Community Spirit ( Ka Mynsiem ia treilang) ka tehsong ia ka jaitbynriew Khasi Pnar.
U la bynniaw ruh ba kane ka jinglong ka la hiar ha kiba bun ki bynta ka sor Shillong. U la ong ba ka Community Bounding ka long kaba donkam bha ban pynkhlain ia ka jaitbynriew jong ngi.
Ha kane ka sngi u Rangbah Shnong, u ma LD Lakiang uba dei u nongialam Sengbhalang ba paw ka ri Jaintia ha ki por mynshwa u la iathuh khana shaphang kumno la sdang iaka Ladthadlaboh, katba ia ka jingialang la pyniaid da u ma JM Pasweth bad la ai khublei da u Nongthoh Khubor, uba dei u Secretary ka Jubilee Celebration Committee u ma Russell Nongrum.
U bah Paul u la plie ia u Maw Sahkynmaw ba don ki kyrteng ki 12 ngut kiba seng ia kane ka shnong bad ruh u la sam ia ki momento sha kiba haiing hasem jong kitei ki 12 ngut kynthup kiba la khlad noh na kane ka pyrthei. Katba ka DMC, kong Darnei ka la ot ia u Cake Jubilee. Ia kane ka jingplie ia ka jingrakhe lyngkhuh snem la pynshongshit shuh shuh da ki jingrwai bad jingshad tynrai na ki seng longkmie LWO, seng Samla LYSO bad na kiwei kiwei ki samla ka shnong.
Kane ka jingrakhe kan kut haduh 27 tarik u Nohprah mynta u snem.
Phi don ban ong eiei?