Plie top um ha Wahthapbru

Shillong, 28 Naitung:
Ha ka sngi saitjain jong ka taiew ba ladep ka Myntri kaba khmih ia ka tnad pohiing ka kong Ro shan Warjri, u MDC ka Mawkhar Constituency u bah JB Basaiawmoit bad u bah Sanlang Kharkongor, ki la plie ia ka top um bad ia ki nar um na ka bynta ban pynpoi umbam umdih sha ki nongshong shnong jong ka Wahthapbroo.
Ia kane ka top um la shna lyngba ka MDC Scheme kaba la kot ia ka T.1 lak tam katba na ka liang u MLA barim jong ka Mawkhar u Dr Friday Lyngdoh lyngba ka MLA Scheme kaba la kot ia ka T.4 lak tam ula noh synniang sha ka shnong, khnang ba kane ka um kan lah ban poi shaduh ki thiew iing jongki.
Ki paidbah kane ka shnong kin ioh ia kane ka umbam umdih na ka tnad Municipal Board bad kane kan pynsuk shibun ia ki ban lait na ka ieng lain ban ioh ia ka umbam umdih.U Rangbah Shnong ka Wahthapbroo u bah K Latoo, ula pynpaw ia ka jingsngewnguh kaba khraw ia u MLA barim bad ia u bah Basaiawmoit kiba la pynioh ia kane ka scheme na ka bynta ban ai jingmyntoi ia u paid nongshong shnong bad ula pynpaw ruh ia ka jingsngewnguh ia ka kong Roshan Warjri kaba la pyllait por ban wan plie ia kane ka jaka sam umbam bad ia u bah S Kharkongor uba la wan mihkhmat ha ka jaka jong u kpa jong u, u Dr Friday Lyngdoh.