|
Shillong: Ka Seng Samla Shnong Nongsder (SSSN) ka la plie pyrda ia ka taiew ki samla ne ka 2nd Tylli Na Rympei Youth week jong u snem 2019 ha ka 18 Lber 2019 ha madan shnong Nongsder kaba hap hapoh Pynursla Civil Subdivision. Ia kane ka taiew ki samla la plie da u Bah Darwel Khonglam kum u kongsan uba dei ruh u Rangbah Shnong ka shnong. Ia kane ka taiew lehkmen ki samla, yn pynkut ha ka 23 u Lber 2019. Ha kane ka taiew ki samla yn don ki jingiakop bad ki jingpyni sab ba pher bapher kiba kynthup naduh ka phut bol, ka cricket, la iatyrko nia, ka thoh ese, ka jingkyntip, ka kiew skong(siej), la iakhun kti, ka iakop rwai, ka extempore, bad kiwei kiwei.
Haba kren ha kane ka sngi u President ka seng u Samla Bateinamlang N Khongwar u kyntu ia ki samla ba kin ialeh ban wad ia ka sap namar ka jingialehkai ka long ruh ka kam ba lah ban im ja. U bynrap ba ka jingialehkai ka long kawei na ki kabu ban iatylli bad sngewthuh jingmut. U ong ba wat hapdeng ka kyrduh pisa ka seng ka duh thiah duh dem ban wad syniang na ki riewkylluid mynsiem haduh ba ngi lah ban pynlong ia kane ka taiew ki samla hadien ba ngim ioh ka iarap kyrshan na ka sorkar kumba ju ioh ha ki snem ba mynshuwa. Katba na ka liang u kongsan u ai khublei ia ka seng kaba la leh shitom ban pynlong ia kane ka taiew ki samla ha ka kynti ba ar. U kyntu ia ki samla ba kin long kiba adkar bad phikir ia ka jingim jong ki. U sneng ia ki samla ban long kiba kiar na ki jingmlien ba sniew kum na kaba dih kyiad bad kiwei ki jingdih pynbuaid.
Ia kane ka jingialang la sdang da ka jingduwai ha kaba la ialam da u Samla Wadbor Khongwar ha kaba la pyniaid da u Samla Evangelist N Khongwar. La sakhi ha kane ka sngi da ka jingiakhun hapdeng ka FC Komik Ïaipyrshang bad ka Sei style Lajong kaba la ioh ia ka jingjop bad ka jingiakhun hapdeng ka Mawkhlieng bad ka Umpohliew ha kaba ka Umpohliew ka la pynliem ia ka Mawkhlieng katba ha ka jingiakhun hapdeng ki rangialehkai ka Seng Samla Shnong Nongsder bad ka Mawiong FC ha kaba ka Seng Samla ka shah thep haduh shiteng dorjon.
|
Phi don ban ong eiei?