Shillong: U myntri rangbah ka jylla u Conrad K Sangma mynta ka sngi u la plie paidbah ia ka tamasa ‘Meghalayan Age’ ha ka shnong Thadlaskein ka ba hap ha West Jaintia Hills ha ka jing ia don lang ki myntri ka sorkar ba kynthup ia u Snaiwbhalang Dhar, Comingone Ymbon bad u MLA jong ka thain u Wailad Shylla.
Haba kren ha ka jing plie paidbah u Conrad K Sangma u la ong ba ka mat ban pynlong ia ka tamasa ‘Meghalayan Age’ kadei ban pyni pyrthei ia ka jing itynnad ka jylla Meghalaya bad ban pynsah jing kynmaw ia ka jing lap ki saintist ia ka snem jong ka pyrthei lyngba ka jing pule bniah ia ki krem ba don hapoh ka jylla. U la ong ba lyngba ka jing ia shim bynta ki nong pyniaid kam jngoh kai pyrthei na kylleng ka ri India bad pyrthei lem bad ki nongthoh khubor na kylleng ka ri India bad ka pyrthei ha kane ka tamasa, ki paidbah na kylleng sawdong ka pyrthei kin tip halor ka jing tiynnad ka jylla Meghalaya.
U Conrad K Sangma u la ong ruh ba ha kane ka tamasa ba la ai kyrteng “celebrating Meghalaya” kan pyni ruh ia ki paidbah ka jylla lyngba ka ‘Meghalayans’ ki ba la tbit ha ki kam ki jam jong ki ban kyntiew ia ka jylla baroh kawei. U la ong ruh ba lyngba ka tamasa kan don ka jing wan ki paidbah na kylleng sawdong ka pyrthei bad kane kan nang pynioh nong ia ka jing kamai ki paidbah ka jylla lyngba ka tnat jngoh kai pyrthei.
Ha kane ka tamasa ‘Meghalayan Age’ kan don ruh ka ‘National Tourism Conclave’ ha ka 14 tarik lber 2020 bad lah ban wan sakhi ruh da u myntri jngoh kai pyrthei ka sorkar India u Prahlad Singh Patel, u myntri ka DoNER u Dr. Jitendra Singh, myntri ka tnat ialehkai u Kiren Rijiju nalor ki myntri sorkar pdeng u Jal Shakti bad u Gajendra Singh Shekhawat lem bad kiwei kiwei de.
Nalor ka jing pyllait paidbah ia ka kot ‘The Meghalayan” stories’ da u myntri rangbah, la iohi ruh ia ka jing pynher ‘hot air balloon’, ka jing rung krem, jing iaid kjat bad ka jing ia put ia tem lem bad kiwei kiwei de ki prokram.
Phi don ban ong eiei?