Shillong: U myntri rangbah ka jylla u Conrad K Sangma myn hynnin ka sngi u la plie paidbah ia ki jaka jngohkai kiba don ha Wah Umiam kiba la tei lyngba ka Swadesh Darshan Scheme kaba la wan na ka tnad jngohkai pyrthei ka sorkar India. La synran ia u Conrad da u myntri ka kam jngohkai pyrthei ka jylla u bah Metbah Lyngdoh, la don ruh u Yogendra Tripathy u Secretary ka tnad jngohkai ka sorkar India bad ki ophisar sorkar.
Haba kren ha katei ka jingialang , u Conrad u la ong ba kaei kaba ka sorkar India ka la pynlut na ka bynta ka kam jngohkai ha kane ka jylla kin ym long lehnohei satia hynrei kan pynmih pisa pynban bun shah ban ia kaba ka sorkar ka pynlut. “Tang shi tyngka ruh ba ka sorkar India ka la pynlut ha kane ka kam kin pynmih da ki spah tyngka hadien bad katei kan kyntiew ia ka ioh ka kot ka jylla” ong u Conrad.
U Conrad u la ong ba ka sorkar kan pynleit jingmut bha ia ka kam jngohkai pyrthei ha kane ka jylla khnang ba kan lah ban khring ia ki nongjngohkai na kylleng ka pyrthei ba kin iohi ia ka jinglong tynrai, ka rukom im bad ka mariang jong kane ka jylla. U la ong ba ha kane ka jylla ki don shibun ki jaitbynriew bad ka sorkar ka kwah ban pynmih ia ki shnong tynrai ki ban pyni ia ki jinglong kyrpang jong ki jaitbynriew.
Shuh shuh u la ong ba ka sorkar India ka la theh ia ki lad jingiarap sha kane ka jylla ban pynbha ia ki lynti iaid lynti ieng ban kyntiew ia ka kam jngohkai bad mynta u la ong ba ka jylla ka kwah ban pynsuk ia ki nongjngohkai da kaba wanrah da ka kad liengsuiñ ka ban kit ia ki briew beit beit na Delhi ne Kolkata shaduh sha Shillong khlem da donkam shuh ban hiar sha Guwahati.
Katba u Secretary jong ka tnad Tourism u Yogendra u la ong ba ka Inda ka la kiew sted bha mynta ha ka kam jngohkai bad ha u snem 2017 ka don ha ka kyrdan ba 40 ha ka pyrthei katba mynta pat ka la kiew sha ka kyrdan ba 25. U la ong ba ka thaiñ shatei Lam mihngi ka dei kawei na ki thaiñ kaba kiew sted bha. U la ong ba ka projek kaba ar jong ka Swadesh Darshan Scheme kaba la dep mynjur ban pyllait pisa ia ka Meghalaya yn pynleit jingmut sa sha ki District kum ka West Khasi Hills, Jaintia hills bad Garo Hills.