Plie ophis ka JNU ha Karbi Anglong

Shillong, 11 Jymmang:
Ka seng Jaintia National Union (JNU) ha ka 9 tarik u jymmang ka la plie ia ka ophis treikam ba pura ka jong kaba la tip kum ka JNU Laher Unit Block (I) Assam Karbi Anglong ha ka shnong Laher, ryngkat ka jingia donlang ki rangbah shnong jong ka thain Bolck I bad haduh kumba 700 ngut ki paidbah Khasi Pnar kiba la sakhi lang ha kane ka jingia lang.
Ia kane ka ophis trei kam ka seng la plie da u General Secretary ka seng kmie u samla Bishar Samayang ha ka jing iadonlang u samla Rick Samayang President Laher Unit bad u General Secretary Chandametre Sun goh ryngkat ki dkhot ka Laher Unit.
Ia ka jingialang la pyniaid da u President Laher Unit, ha kaba u GS ka seng kmie u samlam B. Samayang uba la pynshai ia ka jingthmu jong ka seng ha ka ban wanrah ia ka jingiatylli jingiaryntih hapdeng ki Hynniaw Wasa (Khasi Pnar), ha ki bynta bapher bapher jong ka Ri india ne wat sha bar ka Ri India ruh ban ialeh bad pynioh ia ka hok longbriew manbriew ka jaitbynriew Hynniew Wasa.
Ha kane ka sngi la ioh ruh ia ka jingkren na u rangbah Shnong Deinler u bah Philip Talang, Charles Myrten na ka shnong Lamarang, bah SGB Samayang na ka shnong Kya Rabon, u bah Joplin Sutong na ka shnong Laher lem bad kiwei kiwei de ki riew rangbah kiba paw khmat ka thain Block (I).
Ha ka jingkren jong kitei ki rangbah ki pynpaw ka jingsngewsih kaba khraw ia ki nongmihkhmat ka jylla Meghalaya ha ka por ba la ioh ia ka jylla ba pura ha u snem 1972 ki la klet bad khlem da kynmaw ei ei ia ka Block (I) Elaka Nongjrong Labang Nongphyllut Dolloiship, kaba don kumba 7000 ngut tam ki paid Khasi Pnar kiba hap ha ka 9th Amreng Member Autonomous Council (M.A.C) Constituency Karbi Anglong Autonomous Council.
Ki pynpaw ruh ba ki nongialam jong ka Meghalaya khamtam ki MDC /MLA jong ka Jaintia Hills District ki long kiba khawpud kiba ieit tang ia ka burom ka bym hok bad ka spah khlem da kit khia ia u pud u sam jong ka Ri bad ka jait bynriew. Ki pynpaw ruh ia ka jingshah lehbein ha ki jait bynriew Karbi khamtam naduh ba mih ki seng kieng atiar ha kane ka thain bad na ka liang ka sorkar Assam ruh ka leh shiliang khmat shaba palat. Ia kane ka kyrwoh la phah da u General Secretary ka Laher Unit u samla Chandametre Sungoh.