Plie maw kyrteng U MR, ia ka surok kaba T.131klur sha New Shillong

Shillong:Mynhynnin ka sngi u Myntri Rangbah ka jylla u Conrad K Sangma ryngkat u symbud myntri rangbah u bah Prestone Tynsong ki la plie ia ki maw kyrteng ban shna ia lai tylli ki surok sha sor Shillong Thymmai.

Ha ka jingialang ha Vivanta Hotel, Shillong la plie ia ki maw kyrteng ia ka surok na Lumshyiap Bellafonte sha New Shillong Township ha Umsawli lyngba ka Mawpat kaba 6km kaba T. 49 klur. Nangta ka surok MBT na Bribah Mawpat sha IAS Colony Umsawli kaba 3.2 km kaba T. 27.49 Klur bad ka jingpynbha ia ka surok 2-Lane na Shillong- Diengpasoh na 14 km sha 21.20 km kaba long 7.20 km kaba T. 55 klur.
Ka jinglut ban shna ia kine ki surok ka la poi kumba 131 klur tyngka eiei.

Haba kren ha ka jingialang, u Conrad ula kubur ia ka jingong u bah Prestone ba kane ka sorkar kam kwah ban heh tang ka ktien, hynrei ka pyni beit da ki kam.
Ula ong ba kine ki surok ki long shi bynta ban tei ia ka sor Shillong kaba thymmai, hynrei ha kajuh ka por, kan pynbha ruh ia ka sor Shillong barim.

Katkum ka jingong u myntri rangbah, ka sorkar kan shna park bad jaka iaid jaka shongkai kaba paka ha Golflink ban khring ia ki paidbah bad ba kin ioh lehkai. Ula ong ba ka sorkar ka la pynkhreh shaid shaid ban rah noh ia ka Secretariat bad kiwei ki ophis sha sor Shillong Thymmai, khnang ban kham pynduna ia ka jingsahkut kali ha sor Shillong kaba rim.
Ha kajuh ka por, ula ong ba ka sorkar jylla kan iarap ei ia ki shnong, ki trai jaka ha sor Shillong Thymmai ban leh ia ka jingdro ne planning, khnang ba kan long ka sor kaba itynnad tam kum ka Nongbah Kaba la Pynwandur ne Planning City.

Shwa ia kane, u bah Prestone ula ong ba kane ka sorkar kam kwah ban shu heh tang ka nia, hynrei ka pyni da ki kam. Ula ong ba kat kane ka projek kaba la kot sha ka 131 klur tyngka eiei, la dei ban pynlong jingialang ha madan Polo, hynrei kam kwah ban leh kumta.