Plie Library ka shnong Pyndengumiong

Mairang, 9 Nailar:
Wat lada kane kadei ka juk kaba ki samla pule la ka long ki khynnah skul ne ki khynnah kolej, ki ïabeh sha ka juk jong ka Internet, hynrei ka Shnong Pyndengumiong, ka la peit jngai pat na ka bynta ki khynnah skul bad ki khynnah kolej kiba kham duna ka ïoh ka kot, da kaba plie ïa ka Library jong ka Shnong ha Tirot Singh Memorial Hall, kaba long ka Hall jong ka Shnong.
Ïa kane ka Library la plie ha ka sngi ba long ka Dorbar Kut snem jong ka Shnong ha ka 6 tarik mynta u bnai, da u Sordar jong ka Shnong u Bah B. Syiemïong, ryngkat ka jingïadonlang ki Rangbah jong ka Shhnong. Ka Shnong lyngba ka Education Committee ka la lum ïa ki kot ki sla kiba donkam na ka bynta ki khynnah skul bad kumjuh ruh ki Reference Book na ka bynta ki Entrance Exams. Ka Shnong ka pynpaw ka jingsngewnguh kaba khraw eh ïa kito kiba la noh synñiang da ki kot bad kiwei de ki jingai ban pynbit pynbiang ïa kane ka Library. Nalor kata ki bor shnong ki la ïathuh ruh ba ha kane ka Library yn buh ruh ïa ki kot kiba ïadei bad ki aiñ ki kanun, nangta ki record jong ka shnong bad kiwei kiwei de ki kot ba donkam. Ka Shnong ka kyrpad ruh ïa ki kot kiba donkam kiba kim sngewlah shuh ban pyndonkam ha ïing ki lah ban wanrah ha Library.
Ha kane ka sngi ba pynlong ïa ka Dorbar Kutsnem , la ïoh ruh ïa ki report treikam na ki Committee bapher bapher jong ka shnong kiba trei ha la ki jong ki jong ki kam na ka bynta ka jingiaid shaphrang ka synshar ka khadar jong ka shnong, nalor ba wanrah ruh ïa ka audit report kaba ïadei bad ka jingioh lum pisa bad pyllut pisa jong ka Shnong. Ha kane ka sngi la pynkup burom ruh ïa ki 11 ngut ki samla pule jong ka shnong kiba la pass bha ha ki eksam bapher bapher bad ka la don ruh ka jingpynkup burom kyrpang ïa uwei u khynnah skul uba la pass bha wat lada udei uba don jingduna ha ki dkhot met.