Plie ka Umroi Presbyterian HSS ia ka Auditorium Hall, kaba ki la shna ha ka jinglut ba T. 40 lak 

Nongpoh, 19 Nohprah: Da ka jingkmen kaba khraw, ki nongpyniaid ka Umroi Presbyterian Higher Secondary School, mynta ka sngi ki la ïoh ban plie paidbah noh ia ka Auditorium Hall, ia kaba ki la shna ha ka jinglut kaba la poi sha ka T. 40 lak tam.
Ia katei ka Auditorium Hall jong ka skul Umroi Presbyterian HSS, la leit ban plie paidbah da u Damanbait Lamare, MLA Umroi ha ryngkat ka jingdon u Bah Rangkynsai Kharbuki, MDC, u Bah Ransom Sutnga, u Bah P. Timung, Principal ka Umroi Presbyterian HSS, ki Nonghikai, ki khynnah skul lem bad kiwei.
Kum ban shu kdew hangne, ba ka skul Umroi Presbyterian HSS, ka la dei kawei na ki skul kaba la paw ha Ri Bhoi bad khamtam eh ha Ri Bhoi Mihngi, ha kaba ka la kylla long kum kawei na ki shlem ka ban ai jinghikai ia ki khynnah bad khamtam eh na bynta jong kito kiba wan na ki longiing baduk bad kiba duna ha ka ïoh ka kot.
Lyngba jong katei ka sngi ba la plie paidbah ia katei ka Auditorium Hall, na ka liang u MLA bad MDC Umroi, ki la ai ka jingkular ba kin pynioh lem ka jingiarap ia katei ka skul, khnang ba kin nanglah shuh shuh ban lehbha bad khamtam eh na bynta ban pynphriang ia ka jingnang jingstad hapoh katei ka thain.