Shillong:Ka Mawshun Sports and Cultural Club (MS&CC) ka la sdang ia ka Pilat Khongkliam Memorial Trophy ha ka 4 tarik mynta u bnai. Ha katei ka sngi plie nalor ki dkhot jong ka Club la don lang ruh ki riew rangbah na ka Committee Shnong, ki Member jong ka VDP, Rangbah Shnong uba long ruh ha ka juh ka por u Sordar jong ka Raid mawshun, ki nongialehkai barim ryngkat ki khynnah, samla, longkmie bad long kpa ha ryngkat ki ar tylli ki Team ki ban ia aireng ha katei ka sngi sdang ia ka Tournament.
U Bah Dmingkom Khongdkhar u la long u Kongsan ha katei ka sngi uba long ruh uwei na ki nongialehkai kynjatbol ba bna nam katei ka shnong bad u nongprat lynti ban wanrah ia ka jingialehkai phutbol ha katei ka Shnong ryngkat bad ka jingiatrei lang bad u Rangbah Pilat Khongkliam bam kwai ha dwar U Blei.
Ha ka jingkren jong u kum u Kongsan, U la ai ka jingiaroh ia kane ka Club kaba la lah ban ainam ai burom ia une u rangbah ban pynsah kynmaw ia ka kyrteng jong u lyngba shibun ki kam ba bha ba u la leh ha ki por ba la leit.
Kiwei pat kiba la ai jingkren ha katei ka program ki kynthup ruh ia u Bah L. Dkhar uba long u Rangbah Shnong ha ka juh ka por uba long ruh u Sordar ka Raid Mawshun, Bah Nodrai Khongstid bad kumjuh ruh na ka liang ki bahaing une u rangbah da u Bah O. Khongkliam ba long ruh u para trai jong u Bah Pilat Khongkliam.
Nalor ki nongkren la ioh ruh ki jingrwai bad hadien katei la sdang ia ka tournament hapdeng ki ar tylli ki team ka Team M.E pyrshah ia ka Team VP Fc ha kaba ka VP Fc ka long ka nongjop ha katei ka sngi sdang da kaba tam da 1-0 goal. Ia katei ka goal ka VP Fc la thep da u Arkhangel Khongtyngkut.