Plie ka HYC, ia ka shnat trei kam jongka ha War Mawkynrew

Ha kane ka sngi lah ioh ban pynskhem bad pyntiansmai ia ki nongkitkam kane ka Unit da u General Secretary ka CEC Samla  Roy Kupar Synrem, ha ka jingpyniaid ia ka jingialang da u Samla Robinson Nongrum, President ka HYC Mawryngkneng Circle bad ka jingkren maitphang ia ki nongrim ka Seng da u Samla Franciss G Mawlong, Organising Secretary, HYC CEC ha ka jingdon ryngkat U Samla Isaac Basaiawmoit, Asst G.S. CEC,  ki dkhot ka Mawryngkneng Circle, ki dkhot ka Wah Mawlein Unit bad ki nongshong shnong ka Shnong Umsham.

Na ka liang u Samla Francis G Mawlong, haba ai jingkren maitphang u lah pynpaw ia ki nongrim treikam bad ka jingthmu ba kongsan eh jong ka seng ka long ban iada, ban pynneh pynsah, ban kyntiew bad khamtam eh ban ialeh khlem kynran dien na ka bynta ki snap ba kyrpang jong ka jaidbynriew nalor kiwei kiwei ki jingthmu.

Ha ka jingkren lyngkot hadien ka jingpynskhem bad pynsmai ia ki nongkitkam jong kane ka Unit ha kane ka shnong, na ka liang u General Secretary ka Sengkmie u la ban jur ia ka jingdonkam jong ka jaidbynriew ban ia tylli mlon kawei na ka bynta ban ieng ialeh ia ki jingeh ki ba kum ka Jaidbynriew ngin ia kynduh ha kine ki sngi, ki por bad ki ia.  “Kam pher lada ngi don ne ngi dei kiba  na kano kano ka kyndong kynshrot jong ka Ri Lum Khasi, hynrei na ka bynta ka dawbah jong ka Jaidbynriew ngi dei ban ia mih ha madan lada ka kam bad ka por ka dawa. Dei halor kane ba ka Seng hi ka pyniar ia la u tnum u tyndai ban leit sha kylleng sawdong ka Bri Hynniewtrep ban  pynmih ia ki shipai jong ka Jaidbynriew ba lada ka por ka dawa ngin ia mih ban ieng ialeh ia kino kino ki bor ki ba thmu ban iuhroit bad pynduh jait ia ngi kum ka Jaidbynriew ba kyrpang” ong U Bah Synrem. La pynpaw ruh ia ka jingkmen ban sakhi ba ha kane ka shnong ki lahdon ruh ki longkmie kiba lah pyniasoh ialade sha ka Seng ha kaba lah ioh ban shna ruh ia ka HYC Umsham Women’s Wing.

Ki nongkitkam jong ka HYC Umsham Unit ki long: President: Elishon Nongrum; Vice President: Khet Surong; General Secretary: Syet Surong; Asst G.S: Thori Longshiang; Organising Secretary: Paro Surong; Asst Organising: Slik Surong bad 17 ngut ki Executive members.

Ki nongkitkam ka HYC Umsham Unit Women’s Wing: Chairman: Kong Sidora Surong bad Secretary: Kong Bidramon Nongrum ha ryngkat ki 9 ngut ki member, ong ka kyrwoh na u Samla Francis G. Mawlong, Organising Secretary HYC:CEC.