Shillong 28 Rymphang: Ka Dalmia Bharat Foundation (DBF) kaba dei ka tnat CSR jong ka Dalmia Bharat Ltd. (DBL) ha ka jingiatreilang bad ka Jaintia Eastern College, kala plie paidbah ia ka DIKSHa Centre kaba thymmai (Dalmia Institute of Knowledge and Skill Harnessing) bad ka Entrepreneurship Cell (E-Cell) ha Khliehriat, East Jaintia Hills mynta ka sngi Balang.
Ka DIKSHa Jaintia Eastern College centre ka thmu ban pynkup bor ia ki samla da ki sap ki phong ban pynkhreh ban ioh kam ka jam bad ban pynshlur ban seng kam la jong. Kan sdang ia ka jinghikai Beauty Care kaba nyngkong eh da ka kynhun ba nyngkong jong ka kaba don 30 ngut ki samla pule, katba ka E-Cell kan kyrshan ha ki rukom kam khaii sha ki kam kiba jop.
Kane ka dei ka jingplie ia ka DIKSHa Centre kaba saw ha ka thain shatei lammihngi, kaba pynskhem ia ka jingangnud jong ka DBF ban iarap ia ka thain ha ki kam kiba ka duna. Haduh mynta, ki don 1,200 ngut ki samla pule kiba la pyndep ia ka jinghikai na ki jaka pule jong ka DIKSHa ha ka thain shatei lammihngi, ha kaba 890 ngut ki la shah pynrung ha ki kam bapher bapher.
Ha kane ka sngi la pynkup burom ia kane ka sngi da ka Kongsan ka kong Violet Lyngdoh, MDC ka Khliehriat Rymbai, ha ryngkat ka Kongsan badonburom ka kong Felicity Wann, Assistant Commissioner ka Addl. Deputy Commissioner ka East Jaiñtia Hills District. Ha kane ka sngi la donlang ruh u Pramod Kumar, Technical Head, DCBL, Meghalaya, u Vinay Kumar Mishra, HR Head, DCBL, Meghalaya, bad u Jitumoni Kalita, Location Lead, DBF ryngkat u Dr. P. Nongtdu, Chairman and Principa, Jaintia Eastern College, lm bad ki nonghikai.
“Ka jingiadei jong ngi bad ka Meghalaya ka long kaba la tei halor ka jingthmu ban pynkiew bad ban jingpynkupbor. Lyngba ki prokram bapher bapher, ka Dalmia Bharat ka kular ban wanrah ki kam kiba don jingmut bad ban pynbha ia ka jingim jong ki nongshong shnong. Ka DIKSHa Center ha Meghalaya ka wanrah kum kata ka jingmut – ban tei ïa ka lawei kaba kham bha.Ngi ai khublei ïa ka Jaiñtia Eastern College bad ka Sorkar Meghalaya na ka bynta ka jingkyrshan jong ki ban pynlong ïa kane ka jingthmu kaba lah ban pynlong ia kane ka jigthmu kaba jop,” ong u Bah Ashok Kumar Gupta, CEO ka Dalmia Bharat Foundation.
Ka DIKSHa ka dei ka prokram ai jinghikai ba lah ban pynioh kam ia ki samla. Mynta, kane ka prokram ka pyntreikam ha 21 tylli ki jaka ha kylleng ka ri India, kaba ai jinghikai ha ki bynta bapher bapher kum ka koit ka khiah, ka jingpyntreikam ïa ki mashin shna jain ha ki karkhana, data entry, bad ka jingbuh ïa ka solar PV. Ka la hikai palat 16,000 ngut ki briew, ha kaba ki nongpule ki ioh tulop hapdeng 8,000 haduh 20,000 shibnai. Kumba 75% na ki nongshah hikai ki la ïoh kam ne sdang ïa la ki jong ki kam, bad palat 50% ki dei ki kynthei—kaba pynskhem ïa ka jingangnud jong ka DIKSHa ban pyn ïaryngkat shynrang bad kynthei bad ban pynkupbor ïa ki kynthei.
Phi don ban ong eiei?