Plie jaka sumar pang ha Umtrew

Nongpoh, 17 Nohprah:
Ka long ka sngi kaba kmen bad kaba sah jingkynmaw ia ki nong shong shnong ka shnong Umtrew ha Ri Bhoi District, namar mynta ka sngi u Myntri jong ka Koit ka Khiah u Bah AL Hek u la plie pyrda noh ia ka jaka sumar pang ha katei ka shnong kaba dei ka Umtrew Sub Centre ha ka jingsakhilang da u MLA ka Umsning u Dr. Celestine Lyngdoh.
Kane ka Sub Centre kaba la tei ha ka shnong Umtrew ka dei ka ing building kaba la bei tyngka da ka National Health Mission (NHM) ha ka jinglut kaba la mang kumba T. 26 lak ia kaba la sdang ban tei ia ka naduh u snem ba la dep
Haba kren ha kane ka jingialang, u Bah Hek kum u kongsan ha kane ka sngi, nyngkong eh u la ai ia ka jingiaroh kaba khraw sha ki nongialam shnong jong ka Umtrew kiba la lah shisha ban shimkhia ha kaban pyntreihok ia ka jingtei ia kane ka hospital khnang ba u paidbah un ioh ia ki jingmyntoi ha ka jingsumar ia ka pang ka shitom.Shuh shuh ruh, khnang ban pynlong ia kane ka jaka sumar kaba paka bad kaban dei kawei na ki jaka sumar kiba itynnad bad kaba don lut nadong hadong namar ka jingdon jong ka harud ka surok bah, na ka liang u Myntri u la kyrpad ba kin sumar ia kane ka jaka sumar pang na ka bynta ban pynlait ia ka na ki jingsniew kiba har rukom. Kiwei kiwei kiba la ia donlang ha kane ka sngi ba la plie ia u ne u mawnongrim jong ka Sub Centre ki kynthup ia u MLA ka Umsning Konstituensi uDr. Celestine Lyngdoh, u District Medical and Health officer Dr. L.M Pdah, u Rangbah Shnong ka Umtrew Bah David Kharnaior, Bah MG Kharshanlor, Vice Chairman of Meghalaya Commission on Resource Mobilisation lem bad kiwei kiwei ki heh ki hain sorkar.