Plie ia ka tamasa phlim kaba saw ha nongbah Shillong

Shillong, 4 Nailar:
U myntri rangbah ka jylla u Dr.Mukul Sangma u la plie ia ka Indian Panorama Film Festival kaba saw kaba la sdang mynta ka sngi ha U Soso Tham Auditorium, Shillong. Ia katei ka Tamasa Film la pynlong da ka Directorate of Film Festival , Ministry of Information and Broadcasting ka sorkar India ha ryngkat ka jingiatreilang bad ka Directorate of Information and Public Relation ka sorkar jylla.
Haba ai jingkren kum u kongsan u Dr.Mukul u la pynpaw ka jingsngewnguh ia ka sorkar India ba la bei tyngka na bynta katei ka tamasa kaba lah ban sei ia kiba bun ki riew donsap na kane ka thaiñ bad u la ong ruh ba ka Shillong ka dei ka jaka kaba khring bha ha kine ki sngi ha ki kam ak phlim. Ula ong ruh ba da ka jingwan kaba kum katei ka tamasa kan iarap shibun ia ki nongpynmih phlim ba kin nang ioh jingmut ha kiba bun ki jingeh ba ki ia kynduh. Ula kular ba ka sorkar jylla kan iarap ia ki nongshna phlim na kane ka jylla bad na kane ka thaiñ bad u la ong ruh ba kumba ka jylla ka don bun ki jaka kiba itynnad ban ring phlim bad da ka jingmih ki samla ha ki kam ak plhim ka Shillong ruh kan sa long ka jaka kaba lah ban paw bah ha ki kam ring phlim.
La plie ia katei ka tamasa phlim da kaba pyni ia ka phlim u Nitin Kakkar kaba ym shym la pyllait paidbah haduh mynta ka Ramsingh Charlie. Ha kine ki lai sngi ki ban wan kan sa don ka jingpyni ia ki 13 tylli ki phlim kaba kynthup ia 9 tylli ki Feature film bad 4 tylli kiwei pat. Katto katne tylli na kitei ki phlim ki ban sa pyni ki long ka Head Hunter (ba na Arunachal Pradesh), ka Dau Huduni Methai (Bodo) ka phlim kaba la ring ia ki kam lehnoh,ka Phum Zhang, ka phlim Manipuri kaba pyni ia ka Loktak Lake, Kadambari (Bengali), Ore Udal (Malayalam), Katyar Kalyat Ghusali (Marathi) bad yn pyni ruh ia ka phlim Bajrangi Bhaijan.
Nalor ka Onataah ka phlim na kane ka jylla yn sa pyni ruh ia ka phlim kaba tip kyrteng kum u ‘U Syiem’ ka phlim shaphang u Tirot Sing Syiem. Kiwei pat kiba la donlang ha katei ka sngi plie ki long u symbud myntri rangbah ka jylla u Dr R C Laloo, bah A L Hek, myntri ka tnad Information & Public Relations, Zenith Sangma, myntri ka tnad Sports & Youth Affairs, Roshan Warjri, myntri ka tnad kam pohing bad ki MLA, Tanu Rai, Deputy Director, Directorate of Film Festivals, Ministry of Information & Broadcasting, Government of India, Nitin Kakkar, Director of Ramsingh Charlie, Divya Dutta bad u Kumud Mishra, u aktor ka phlim Ramsingh Charlie bad ki ophisar na ka tnad Informaion and Public Relation.