Plie ia ka Ri Bhoi Synod College ha Umsaitsning

Nongpoh, 06 Naitung:
Kan long ka jingkmen kaba khraw ia ki samla pule ym tang ha ka thain Umsning, hynrei ha ka Distrik hi baroh kawei bad kane ka la wan hadien ba mynta ka sngi u MP ka Shillong Seat, u Ma Vincent H Pala, u la wan ban plie paidbah ia ka Ri Bhoi Synod College kaba don ha ka shnong Umsait-sning, Ri Bhoi District.
Ha kaba plie paidbah ia katei ka College, nalor ka jingdon u Ma Vincent Pala kum u kongsan, la sakhi ruh da ka jingdon ryngkat u Bah Donkupar Sumer, MDC ka Umsning Constituency, ki Pastor Rangbah ka Ri Bhoi Synod, kiba kynthup ia u Rev. B R Pamshong, u Rev. L,S Nongphlang, u Rev P. Mawnai, u Rev F.W Shadap, u Rev K.E Rympeit, ki Tymmen Basan, ki Riew rangbah ka thain lem bad ki rangbah Balang jong ka Balang Presbyterian ka Ri Bhoi Synod.
Khyndiat kum ban shu pynkynmaw hangne, ia katei ka College kaba dei ruh ka College ba nyngkong jong ka Ri Bhoi Synod, la tei lyngba ka MP Skim jong u snem 2013-2014, ha ka jinglut kaba la kot sha ka T. 40 Lak tam tad haduh ban da lah syndon ban plie paidbah mynta ka sngi.
U Ma Vincent Pala, haba kren kum u kongsan ha kane ka sngi, u la pynpaw ia ka jingkmen ba un ioh ban iadon bynta lang ha kane ka sngi kaba kyrpang tam jong ka Ri Bhoi Synod, hadien ba ki la ioh ban plie paidbah ia la ka jong ka College, kaba long ruh kum ka kawei na ki shlem ka ban ai jinghikai ia ki khun samla kiba kwah ban pyndep ia ki jingpule kiba kham halor.
Ha kajuh ruh ka por, u la ai ruh ka jingïaroh kaba khraw ia ka Ri-Bhoi Presbyterian Synod, kiba la don ia kaba kum kane ka jingangnud na ka bynta ban kyntiew ia ka kam pule puthi ha kane ka juk iabeh jingstad kaba mynta.
La pynkut bad pynphuh pynphieng ruh ha kane ka sngi da ka jingrwai kaba la iashimbynta ki samla pule jong kane ka College bad ki nongrwai jong ka Ri Bhoi Synod Standing Choir.