Shillong: Ka College Week jong ka Khadsawphra ka la sdang myn hynnin ka sngi 7 tarik bad kan kut haka 14 tarik mynta u bnai.
Ha kane ka sngi u Bah Boldness L.Nongum MLA barim uba long ruh u Principal jong kane ka College ryngkat bad u bah Lawan Pynshngain War uba long u President jong kane ka College kila plie paidbah noh ia ka footpath kaba jrong 500 phut ka lynter bad 8 phut ka jingiar na ka bynta ki khynnah pule ban lait na ka ktieh ha ka por lyiur.
U Bah Boldness ula iathuh ba kan long ruh kum ka jingpynkhreh na ka bynta ka KJP Synod Samla 2020 kaban long ha kane ka jaka. Ia kane ka footpath la siang pynitynnad bha da ki Tile ba la shna ha Kynshi ha karkhana u bah Wen Marwein. “Ngi sngewsarong ba hapoh 14-8 la don ki briew la jong kiba la lah ban shna kum kine ki tile kiba ymtang ba ki itynnad hynrei ki long ruh kiba bha kiba ngim donkam shuh ban leit thied na u dkhar” la ong u bah Boldness.
U bah Lawan nalor ki jingkren kyntu ia ki samla pule ha kaba iadei bad ka jingiashim bynta jong ki ha ki bynta bapher bapher ha ka college week u la iathuh ba ka college ka dang trei shait shi shait ia ki project bapher bapher ban pynbit pynbiang ia ka jingdonkam ki samla pule. “Ngi kwah ban pynlong ia kane ka College kawei na kiba bha tam ban ai ka jingshakri iaphi ki samla pule” la ong u bah Lawan.
Ha shwa ban sdang ia ki jinglehkai kiba pher bapher la ioh ka jingbatai pynshai bad jingpynbam smai ia baroh ki nongiashimbynta ha kane ka College Week da I Miss Aida C.War Vice Principal bad pynkut da kaba iawer ia ki samla pule ban kin jop ia ka thong kumba ka Motto jong kane ka taiew lehkmen ka long ‘Press towards the goal’.
Phi don ban ong eiei?