Plie ia ka jingkieng Wah Umngi

Mawkyrwat, 7 Nailar:
Ka jingkieng iaid kali ha Wah Umngi, kaba hap ha hapoh ha skim NLCPR, la plie da u Myntri Rangbah Ba ar u Bah Rowell Lyngdoh ha ka jingiadonlang bad u Myntri ba dei khmih ia ka tnat PWD Roads u Bah S.Dhar, u MDC jong ka Ranikor u Bah M. Nong rem, Bah H.Lyngdoh, MDC ka Mawkyrwat,u Bah N.Syiemiong syiem jong ka Maharam, ka kong R.Lyngdoh ka ba dei ka Deputy Commissioner jong ka South West Khasi Hills District, ryngkat bad kiwei ki dkhot jong ka Sorkar kynthup ia ki khlieh jong ki ophis ha ka District,ki nongmihkhmat shnong bad ki briew jong ka thain ha ka jingpynlong kaba long ha jan jong ka jingkieng ha ka 6 tarik u bnai nailar 2015.
Katkum ka jingkren kaba la ai jingkren da u Myntri Rangbah Baar u Bah Rowell Lyngdoh u la pynkynmaw ia ki por barim bajah ha ka por bym pat don kane ka jingkieng bad ka surok,ha kaba ki briew ki iaid da kaba ki hiar bad ki kiew ban iaid shakhmat bad ban phah ia ki tiar bam na kawei ka jaka sha kawei pat ka jaka.u la ong ruh ba kane ka long hadien ba la ioh laitluid, ka sorkar Assam ka la shna ia ka jingkieng Semi-permanent temporary bridge (SPTBUG). Ka jingkieng kaba la neh palat sanphew snem bad kaba la iarap shibun ia ki briew ha kane ka thain.kane ka jingkieng ka la nang rim shuh shuh bad ka donkam ba kane kan neh khang ba ka thain kan bteng.U la pyntip ruh ba dei ha ka snem 2011 bnai Jylliew la mang ia ka pisa T.706.61 lak lyngba ka ministry of DONER ban shna ia ka surok iaid kali, ha ka Wah Umngi bad kane ka la urlong mynta.
Kane ka jingkieng ba la shna thymmai ka la wanrah jingkmen sha ki briew ka Mawkyrwat ha kaba ki la lah ban iaid ban ieng laitluid bad iada,u la khot ruh ia ka imlang sahlang ba ki dei ban iada ia ka jingkieng bad lehkhuid bad sngew ia ka jinglongtrai ia ka jingkieng kaba ka sorkar ka la shna na ka bynta ka jingdonkam jong ki briew.
Kiwei pat kiba la ai jingkren hadien ki long u Bah S.Dhar,uba dei u Myntri jong ka Tnat PWD bad ka Kong R.Lyngdoh kaba dei ka Deputy Commissioner jong ka South West Khasi Hills District, Mawkyrwat.
Ha kane ka sngi kyrpang la don ruh ki jinglehkmen ha kaba la ioh ruh ka jinglehkai barit na ka Iong Lajong Musical & Organisation Mawlangwir, ka jingrwai kyrpang na ka Krem Lamet Group, wahkaji,ka jingrwai pdiang burom na i ibanrilin Lyngkhoi bad ka kynhun,ka jingsam Momento sha u kontraktor u Bah R.Marngar,ha kaba la aiti da u Myntri ka Tnat PWD u Bah S.Dhar. Ia kane ka jingpynlong la ai jingkren khatduh da u Bah L.Passah,uba dei u CE ka PWD (R),bad ka jingaikhublei la ai da u Bah M.Kharnaior,u EE.PWD (R) Mawkyrwat Division.