Plie ia ka jaka sumar Emergency & Trauma Unit jong ka KJP Hospita, Shillong

Shillong: Ka Dr H Gordon Robert Hospital, Jaïaw, ka la plie ïa ka bynta ai jingsumar kaba dang shu dep pynthymmai ïa kaba la tip kum Emergency & Trauma Unit kaba don hapoh compound jong kane hi ka hospital. Ka jingplie paidbah ïa kane ka Emergency & Trauma Unit ka la long ha ka sngi nyngkong jong ka taïew, kata ka 25 tarik u Lber 2019, ha kaba i kong Hiarmon Pyrtuh, Chairperson jong ka Jingïaseng Kynthei KJP Assembly, iba long ruh ka dkhot jong ka Governing Board jong kane ka Hospital, ila long ka kongsan. Ha kane ka hospital mynta ka don ruh ka Licensed Blood Bank, ka Respiratory Therapy, Physiotherapy, Occupational Therapy, Radiology Department bad 24 kynta ka Laboratory Department, bad Pharmacy Department. Kane ka long ruh shi bynta jong ka jingrakhe ïa ka lyngkhuh snem kaba 97 jong kane ka jaka sumar. I Rev RM Kharshandy, chaplain jong ka hospital, i la pylong jinduwai kaba kyrpang na bynta kane ka sngi. Kane ka jaka sumar ka don ïa ki doctor kiba la pyntbit ïalade ha kane ka phang kata kum Dr. Banhiam Carey Kharrngi (Fellowship in Accident and Emergency Department), Dr. Banteilang Nonglang (MS Ortho, CMC Vellore), Dr. R. Nongrum (MS Surgery), Dr. I. Syiemlieh (MS Surgery), Dr. Kenneth R.L. Nongpiur (MS Surgery,MCH Paediatric Surgery), Dr. Meban Aibor Kharkongor (MD Medicine), Dr. Ibakordorshisha  Sun (DCH from CMC Vellore), kumjuh ruh 4 ngut ki nurse kiba la ïoh jingpyntbit na ka Accident and Emergency Services, CMC Vellore, kum i Sr Banricity Mond, Sr Aibabiang Dkhar, Sr Lana Careen Dorphang bad Sr Ibandarishisha Dohtdong.

Lah ban kdew hangne ba ha u snem 2018 ki don haduh 14,576 ngut ki nongpang kiba la shah sumar, kata 9,554 kiba la shah bat, bad 5022 kiba shu ai dawai lane phah sumar noh shawei. Ha u snem 2017 pat ki don 11,857, kata 7974    kiba sah bad 3883 kiba la shu ai dawai. Ki bynta ba dang shu dep pynthymmai hapoh kane ka department ki long ba la buh shuh sa 6 tylli ki jingthiah, ka jaka khreh na bynta ki nurse jong ka Emergency & Trauma unit, ka Consultation Room, ki almari bad shuki ba thymmai, nalor ba la ai rong, la siang ruh da ki tiles, ki wiring ba thymmai, kumjuh ki kamra ba long katkum kane ka juk, lem bad ka jaka ban ap ki nogsynran nongpang. Ki tiar ba la thied thymmai ki kynthup ïa 8 tylli ki trolley, kawei ka Cardiac Monitor, 3 tylli ki Pulse Oxymeter bad 5 tylli ki Wall mount stand.