Pleng!! Ka Protocol ka treikam tang ia ki rit ki ria ha Meghalaya

Babu Kular Khongjirem

Ka jingpyrkhing(strict) ka sorkar ia ka khlam Covid-19 ha ri India khamtam eh ha Meghalaya ka la paw pen ryngkew noh hi pyllein pyllein ba ka ain ka treikam tang ia ki rit ki ria,ki duk ki suk,ki kup trap ki kup knup bad ki kup shiliang ki sem shiliang.

Na ka bynta ki heh sorkar, ki minister bad kiba don ha ka bor,ki iaid bad shang katba mon ym don khlam Covid-19 ne Covid-20.Ka protocol ka treikam ban pyndik, pynjynjar bad pyn sohsat tang iangi ki rit ki ria bad ki duk ki suk. Dang shen, shi sngi ar sngi mynta,ki heh ka sorkar MDA ki la phla paidbah ba ki heh sorkar naduh ki minister haduh ki officer heh jong ka Meghalaya kim da donkam satia kano kano ka jingteh pyrkhing ia ka leit ka wan jong ki, hynrei ki iaid bad leit katba mon(lada donkam) wat shaduh shabar ka jylla ruh.

Ki hap ban leh ia kata ka test RT-PCR ban pyn thymme ba ki lait bad kim don ka jingshit Covid-19/20.hakhmat ka pyrthei. Ia kaba kwah ne donkam ma ki,ki pynmih ain thymmai (amendment) ne order katba mon na ka bynta ka bit ka biang jongki.Ia ki nongkyndong,kiba biej kiba them, ki duk ki suk lei,kynmaw bha lada phi kum bakla tiak phin shah rah ei sha along ne phatok(jail) nalor ka bai kuna (fine) kaba heh. Ia ki nongdie jingdie ha madan madiah bad ha surok ha lynti lei,kin beh bad tim iaphi la kum ki ksew ki miaw.Dei hangne kein ba ka ktien ka ju ong,uba ioh u nang ioh hynrei uba duk te kin nang duk bad nang swai ar shah lai shah.

Ka ain ka ong ba ‘ym don uwei ruh uban long halor jong ka ain(no one is above the law).Ka constitution jong ri India lei ka kren shai ia ka jingia ryngkat(equality) ia baroh ki nongshong shnong ka ri India naduh kiba heh tam(president of India) haduh kiba rit tam.Ym don ba duk ne riew spah hakhmat jong ain.Kum kane ka ain ka pynkmen bad ai mynsiem ia ngi kiba rit- kiba biej bad kiba duk.Pynban ha ka jingpyntreikam(in practice) jongka pat, ka long mar khongpong.

Ka ain ka shah shiliang ia kiba heh bad kiba riew spah.Lada tuh ne thok kiba heh bad ki riewspah, ka ain ka leh rain ia ki,hynrei sangsot pat,lada tuh ne bakla mangi kiba rit,katba phi nang pan map,katta kin nang ai eh iaphi haduh ba phin da jem hi jai. Namar ka Covid-19/20 kadei ka jait jingpang ba ia bit(infected virous), kan ym map satia ia kiba heh ne kiba rit kumjuh.Ki heh sorkar ne ki nongbylla ki don ka juh ka snam,ki juh ki dkhot met kum ki briew.Lada ia ki heh sorkar la shah ban leit kylleng ka ri India shaduh Delhi( ka nongbah ba dang jur bha kane ka Covid-19)bad lada kumno re kumno ki kum rah jingpang, kiban iap bad kordit ki dei ki paidbah bapli kiba duk bad kiba kordit.

Kin don hi ki riew paidbah ruh kiba donkam shabar ka state,hynrei ym pat shah satia ia ki ba kin leh kumta namar bym dei ka duty ne ka kam sorkar.Mano hi ban leit shabar ka jylla khlem ki kam kyrkieh ne khlem donkam eh ?Mano hi ban iaid lait na kata ka test RT-PCR haba donkam?Lada ia kiba heh donkam shong(quarantine) tang shi sngi ar sngi ha ing lajong, phi pat ki riew paidbah phin hap sah 14 sngi ne wat haduh 28 sngi ruh ha quarantine centre jngai na ki kmie ki kpa bad ki ba ha iing ha sem.Ha kiwei kiwei ki ri kiba la shai(developed countries),dei ki nongsynshar bad ki heh sorkar kiba leh shwa ia lade,nangta ki mai bad sneng pat ia ki paidbah ba kin bud nuksa ia ka jingleh jongki.Hangne ha ri jongngi pat, ka long da khong pong.Phah leh shwa ia ki riew paidbah katba ki nongsynshar pat leh bad iaid lait(excemption ) kat kum ka jingkwah jong ki.

Kane ka dei ka ain jong ka ri India namar ka dei ka ri synshar paidbah(democracy) kaba ai mon bad ioh lad ki nongsynshar ban shim kabu katba ki mon ne katba ki kwah ban pynhun bad pynmyntoi ia ka thong ne ka jingang nud jong ki.