Pied ki runar ia ka ïing ha Nongstoiñ

Nongstoiñ: U wei u rangbah u bala tip kum u bah Adkar Kharshandi 43 snem na ka shnong Nongstoiñ u la leit ban ujor sha ki pulit Nongstoiñ halor ka jingshah pied ka ïing sah ka jong u bad rong tuh ruh ia ka pisa bad ki ksiar.
Katkum ka tyllong khubor na ki pulit la ong ba katei ka jingjia kala jia ha ka 24 tarik mynta u bnai ha kipor 9:30 AM haduh 3:30 PM kaba dei ruh kipor bym don briew ha katei ka ïing sah ka jong u kaba don hajan ka ophis DTO Nongstoiñ.
Shuh shuh la ong ruh ba kitei ki runar kila khura ia ka ïing jong u bad pied ruh ia ki almari ha kaba kila ioh ruh ban rong tuh noh ia ka pisa kaba T.50 hajar tyngka lem bad ia u wei u sati ksai bad ar tylli ki soh skhor ksiar.
Kumta na ka liang jong ki pulit ki la register ia ka case bad ki dang pynlong ruh ia ka jingtohkit ban lap ksai ia kitei ki runar kiba la don kti ha katei ka kam.