Phyrnai khrek ka sahit bneng, ha ka jingplie ia ka SAG ha Polo

Shillong, 07 Rymphang:
Ka nongbah Shillong hynnin ka sngi, ka la sawa bad phyrnai khrek da ki jingshai bad ki jingpynbthei khamtam ha sawdong ka madan JN Stadium, Polo, namar ka jingplie ia ka lympung 12th South Asian Games (SAG).
Ia kane ka lympung ha Shillong, la plie paidbah da u Myntri Rangbah ka jylla u Mukul Sangma hapdeng ka jingiphuh iphieng ba la pynriam bad pynitynnad ia ka jingpyni sarong na ki briew ba la pynkhreh bha.
Ia kane kajuh ka lympung, la plie shwa da u Myntri Rangbahduh ka ri u Narendra Modi ha Guwahati, da kajuh ka jingphuh jingphieng ha ka sngi Thohdieng.
La pynshongshit ia kane ka janmiet da ka jingtem ka jingrwai ‘Ei Prithvi ek Krirangan’ ryngkat ki jingshad tynrai jong ki jaidbynriew Assamese, Khasi, Garo bad ka jingmih u Tikhor ka SAG ha rynsan.
Ki nongialehkai na ki 8 tylli ki ri khyndew bah Asia ki la iaid ha madan  kynthup ka Afghanistan kaba wan 94 ngut, Bangladesh 137 ngut, Bhutan 155 ngut, Maldives 38 ngut, Nepal 128 ngut, Pakistan 85 ngut, Srilanka bad India mar 141 ngut.
La pyni sarong ka jylla ia ka dur jongka Mawlynnong kaba dei kawei na ki shnong ba khuid tam ha ka Asia, nangta sa ka jingrwai ba kyrpang na ka Shillong Chamber Choir ryngkat ka jingshad jong ki khynnah bad ka jingpynher ïa ki ballon bad jingpynbthei pataka.
Haba kren ha kane ka janmiet, u Mukul u la ong, ba ka long ka jingsngew sarong ïa ka jylla Meghalaya ban ïoh pdiang ia ki 8 tylli ki lama jong ki 8 tylli ki ri kiba ïashim bynta ha ka South Asian Games (SAG) .
“Na ka bynta ka Shillong, kane ka dei ka sien ba ar ba ka la pynlong ïa ki prokram ba heh ba wan ïashim bynta da ki ri bapher bapher bad kaba nyngkong ka dei ka Indigenous Terra Madre ha u 2015″, la ong u Mukul.
U la bynrap, da kaba ong ba kane kam dei ban kut tang ha ka kam ïalehkai hynrei kane ka jingïasnoh jong ki 8 tylli ki ri ka dei ban long ruh ha kiwei kiwei ki bynta na ka bynta ka jingmyntoi ki paidbah.
Katba u  myntri ka tnad ialehkai ka ri uba long ruh u Chairman ka Organising Committee u Sarbananda Sonowal u la ong ba ka SAG ka la dei ka jingwanrah ia ka jingiajan hapdeng kine ki ri baroh ban iatreilang sha ka roi ka par.
La sakhi ia kane ka janmiet, da ka jingwan da ki hajar ki paidbah ka jylla.