Phuh ka tamasa Ri Kunai La Tynrai, ba pynlong ka NEFA ha Umden

Nongpoh:U Bah Prestone Tynsong, Symbud Myntri Rangbah ka sorkar jylla, mynhynnin ka sngi, u la wan ban iashimbynta ha ka Tamasa Ri Kunai la Tynrai, ka Tamasa kaba la pynlong da ka Nongtluh Eri Farmer Association (NEFA) hapoh ka shnong Umden, Ri Bhoi.

Katei ka Tamasa kaba la pynlong da ka NEFA, ka dei halor ka nongrim kaba ki kwah ban pynpaw paidbah ia ka Riti dustur kaba la don da ki shnong kiba don hapoh jong katei ka Raid Nongtluh.
Lyngba jong katei ka sngi, la iohi shisha ba katei ka Tamasa, ka la long kaba shongshit bad kaba ishongkun, namar la jan baroh na ki shnong kiba don ha katei ka Raid ki la wan ban iashimbynta, da kaba pyni paidbah ia la ki jinglong tynrai, kata naduh ha ka rwai ka siaw, ka put ka tem, ka shad ka mastieh lem bad kiwei kiwei ki rukum kaba la leh da u mynbarim.

Khyndiat haba kren halor katei ka Tamasa, u Bah Prestone Tynsong, u la pynpaw ia ka jingkmen ban iohi halor ka jingshimkhia da ki nongialam ka NEFA ban pynlong ia katei ka Tamasa, kaba long ruh kum shibynta ban pynneh pynsah ia la ki riti dustur bad kaba long ruh kum ka jingnang pynskhem ba ka Jaidbynriew ka dang im bad kaba dang don ia la ki riti dustur.

Namarkata, u la kyntu ia kitei ki nongialam ka NEFA ba kin iai pynlong ia kiba kum kitei ki Tamasa manla u snem, khnang ba ki paidbah na ki shnong bapher bapher kin nanglah shuh shuh ban pyni ia ki riti dustur bad ban pynneh ia la ka jinglong tynrai.
Ha katei ka Tamasa, nalor u Bah Prestone Tynsong, la sakhi ruh da ka jingdon u Bah Mayralborn Syiem, MLA Nongpoh kum u symbud kongsan, Marchborn Syiem Synjuk Rangbah Shnong ka Raid Nongtluh, kong T Syiem, Syiem Sad Raid Nongtluh, B Mallai President NEFA lem bad kiwei kiwei ki riew Rangbah.