Shillong, 17 ’lyngkot:
Ka aiom leh kmen ki hep barit ha kane ka shuti tlang jong ka Seiñ Khasi Seiñ Raij kaba la long ha ka 14 & 15 tarik Kylla-yngkot 2017, ha Khlieh-tyrshi, West Jaiñtia Hills ka la poi sha kaba kut ha kaba u Blei Trai Kynrad u la ai ka sngi kaba shit ba kmen bad da ka jingiphuh iphieng.
Ha kane ka sngi ba nyngkong kata ha ka 14tarik Kyllalyngkot 2017 la wan ban plie pyrda ha kaba u la pynher ïa ka lama jong ka Seiñ Raij Khliehtyrshi da u Kongsan, u Waheh Comingone Ymbon M.L.A. Raliang Constituency ryngkat ka nguh ka dem da u Waheh Sniawbha Shylla, Assist. Waheh Shnong Khliehtyrshi.
Hadien kane la pynlong ïa ka jingïalehkai Mawpoiñ ïa ki kynthei ha kaba la jop da ka Seng Khasi Mawroh Roh na Tyrsad Pyllun bad kaba wan ba ar da ka Seng Khasi Ksehkohmoit, na West Khasi Hills District. Ïa ka Rongbiria na ka bynta ki Shynrang la rah da ka Seng Khasi Mawmuathoh Lum Shillong Lum Rapleng Pyllun bad uba wan ba-ar u dei na ka tnat Seng Wahsohlait Tyrsad Pyllun
Ha ka sngi ba khadduh ka 15tarik Kyllalyngkot 2017 ïa ki kam baroh la leh da ki Hepbarit ka Seng Khasi Seiñ Raij, naduh ka Nongpynïaid da ka Heprit Solinda Rymbai, Nguh Blai da u Heprit Damehipaia Ryngkhlem, kren pdiang burom da ka Heprit Rana Rymbai, ki jingkren halor ka phang “Ka jinglong-khynnah” da ka Heprit Daka Suna bad sa kawei ka jingkren halor ka phang “Ka Niam bad ka jingngeit” da ka Heprit Endalin Thabah bad ka jingkren ai khublei da ka Heprit Phalang Rymbai. La ioh ruh ïa ka jingpyni ïa ki jingshad tynrai, ki drama lyngkot, ki jingpule ïa ka jingsneng Tymmen, bad jingrwai tynrai da ki tnat Seng Khynnah Seng Khasi Seiñ Raij bapher bapher jong ka Bri U Hynniew Trep Hynniew Wasa.
La ioh ruh ka jingsneng jingkraw na i kongsan ha kane ka sngi I Dr. Phillamon Nongbet I Trai ka Super Care Hospital bad I la kyntu ïa ki Hepbarit ban beh ïa ka jingnang jingstad kat kum ka juk mynta ym ban iehnoh ïa ki jingpule shiteng por bad ha ka juh ka por ban nym iehnoh ïa ka ñiam tynrai kaba u longshuwa man shuwa u la ai ha kaba ka juk mynta baroh kawei ka pyrthei ki ïawad ïa la ka jong ka Niam Tynrai.
La pynkut ïa kane ka aiom lehkmen da kaba aiti ïa ka Dongmusa ka jingshai, Ia ka lawei ba phyrnai da u Heprit Dakerchami Ryngkhlem, Seng Khynnah Khliehtyrshi sha u Heprit Akbar Nongdhar, Seng Khynnah Mylliem kum ka dak ka jingaiti ïa ka Lympung Ki Khynnah Seng Khasi Sein Raij kaba 13 ka ban long ha Mylliem, East Khasi Hills bad u la kyntu ïa ki para kur para kha ban ïa wan pynshngain lang ha kane ka Lympung ka ban long ha Mylliem ha u snem 2018. Hadien kane la ioh ka kyntien jingkykhu kyrdoh na U Adviser U Rangbah Spiton Kharakor bad u la pynhiar ruh ia ka lama jong ka Seng kum ka dak ka jingpynkut ïa kane ka Lympung kaba 12.
Phi don ban ong eiei?