Shillong: Ka la don ka jingjia kaba sngewsih hynnin ka miet, ia ki samla jong ka Jylla, kiba wan phai na Delhi, ha kaba ynda rung ha Bihar, ki la hap ban ia shong lang ha kajuh ka rel bad ki dkhar kiba na Bihar.
La iathuh ba kitei ki dkhar, kiba don bun spah ngut, ki la dep siew pisa ha ki pulit Bihar bad hadien ba ki la dep siew, ki rung jubor sha ki jaka shong bapher, ba kynthup ia ki jaka ba don ki kynthei briew ruh.
“Ki samla kynthei kiba wan phai na Gurgoan Delhi, lyngba ka rel ba kyrpang ki la pyntip ia nga ba yn da ka train ka la poi ha Bihar ka train ka la sangeh bad la iohi na ki jingkhang iit ba ki Pulit ki pynieng ia ki paidbah Bihar bad hadien ba la shim pisa na ki, ki la rung ha ki compartment jong ki train, don ki ba la pyrshang ban khanglad, hynrei kine ki khar Bihar ki la kawang da ki maw haduh ba la pynjulor ia ki iing jong ka train” ong U bah Thomas Passah, Vice President jong ka seng Khun Hynniewtrep National Awakening Movement (KHNAM), uba la iakren hi bad kitei ki samla shem lanot, haba iathuh ia katei ka jingjia ha U Rupang.
“Lyngba ki dur ba kine ki samla ki la phah la iohi shaikdar ia ka jingthombor. Nga sngew phylla bad sngewlyngoh bad haba jia kumne ka pynlong ia ngi ban buh jingkylli, Ha kano ka rukom ka sorkar ka la pynkhreh ban ia khun ia u Covid-19? Kumba u CM, Dy CM ki la ong sha u Paidbah naduh ba sdang” ong shuh U Bah Passah.
Ym tang katta, la iathuh shuh shuh ba ki don bun phew ngut ki samla, kiba wan na Delhi hynnin ka miet, da ka rel, kiba la ujor ba kim shym la ioh bam satia, la shisngi shi miet, naduh ba ki mih na Delhi bad katei ka khubor, ka dei kaba la ioh lum, haduh ha ka por, ba ki dang shu rung ha Uttar Pradesh.
Phi don ban ong eiei?