Phong ka Nalbari, da ka rong iong suda ban pyrshah ia U MR ka Assam

Ka surok jong ka Nalbari, hynnin ka sngi, ka phong da ka rong iong suda, ha kaba la pynher da ki jain iong shi lynter bad katei ka dak jong ka jing pyrshah ia U Sarbananda Sonowal, myntri rangbah ka Jylla Assam, namar ka ain Citizenship (Amendment) Act.

Ki dkhot jong ka All Assam Students’ Union (AASU), ki la ia mih paidbah hynnin ka sngi ha Nalbari bad ka la don ruh ka jing ia pyni bor hapdeng ki nongialam ka AASU bad ki pulit, ha kaba ka la sdang mih ka jing ia kynad kaba jur ha katei ka jaka.

Hadien kata, ki la mih sa ki dkhot jong ka AJYCP, kiba pynher lama iong ha ka lynti iaid jong U Sonowal bad la kem ia ki katto katne ngut ki dkhot jong katei ka seng da ki pulit.

Katei ka dei, ha ka por ba U Sonowal, u leit sha Sarthebari, kaba ha Barpeta ban leit sha ka prokram lehniam ha katei ka jaka bad ula shah pynwit haduh ar sien kynthih ha ki kynhun kiba pyrshah CAA.