Phla u Bania ba lait im ha ka jingshah rahbor ha ki lehnoh

Pathankot, 5’lyngkot:
U Bania uba la lait im ha ka jingshah rahbor ha ki lehnoh ha pathankot u la ong b aum shym khmih lynti shuh ba un dang im hynrei u la ong ba dei da ka bor blei ba ki lehnoh ki la pyllait im ia u bad ki bret ia u ha kawei ka khlaw.
Utei u Bania u dei u Rajesh Verma uba dei u paralok uba SP ka Gurdaspur. U Verma u la iathuh ba ha ka por ba ki lehnoh ki rahbor ia u ki bunkam bha ban ia kren bad u heh jong ki uba ki ong Commander Sahep bad ka jingkren phone jong ki ka long ha manla ki 10 minit.
Ha katei ka jing iakren phone jong ki lehnoh u la ong ba la sngew kumba ki la bakla lynti namar ba u nongniah kali jong ki, u la ong ba kane kam dei ka lynti kaba dei ban iaid hynrei kham hadien u la ong ba ki la pyndon da ka GPS bad ki la lap ia ka lynti ba dei ban leit namar ba ki la ithuh na ka jingdon jong kawei ka wah. U la iathuh ba u la iohsngew ba u heh jong ki uba ki ong u Major Sahep ha ka jingiakren phone jong u bad u Commander Sahep u la ong ba kim don jingeh eiei eban poi sha ka jaka bad ka thong ba ki thmu ban leit bad u la ong ba u iohsngew ruh ba ki ong ba ka jingiaid lynti ka long kaba biang khlem don jingeh eiei.
U Verma u la iathuh ba um da sngewthuh bah namarba ki ia kren kham bun da ka ktien Urdu bad khyndiat kiwei pat ki ktien hynrei u sngewthuh tang ka ktien kaba ki ong Insha Allah kaba ki la ong ruh ngin jop ha ka thong jong ngi. Ula ong ba kitei ki lehnoh ki pyndonkam 5 tylli ki phone ban ia kren nyngkong ki la pyndonkam da ar tylli ki phone jong ki hi hynrei namarba kam don battery shuh ka phone jong ki ki la pyndonkam da ka phone jong u bad ar tylli ki phone u SP.
Ha katei ka por ba ki rahbor ia u la ong ba ka dei ha ka por 12 haduh 4 baje mynstep. Katkum ka jingiathuh utei u bani auba la lait im u la ong ba kitei ki lehnoh ki la knieh ka pisa jong u T.500 tyngka bad uwei na kiba shong syndah bad u u la thep hapoh pla jaket katba kham hadien ki la shim sa T.1500 tyngka bad ki la iehnoh ia ka pla pisa jong u hapoh kali. U la iathuh ba ki la sliah ia u pdot jong u hynrei kham hadien pat ki la bret noh ia u sha khlaw bad ki la phet krad. U la ong ba kitei ki lehnoh ki don ki tiar kiba khia kiba suba ba ki dei ki kynja tiar pynbthei kiba khlain bor.