Phikir na ka jingshah tuh pisa ATM: SP

Shillong,16 Nailur:
Nalor ki ba bun ki jingmaham ba ki pulit ki la maham ia ki paidbah ba kim bit ban ia thuh bniah shaphang ki ATM jong ki sha kino kino ki briew kiba phone sha ki, ki pulit ki la lap ba dang bun na ki paidbah kiba dang shah thok bad ki duh ei ia ki pisa jong ki. U SP EKH u bah M.Kharkrang u la ong ba ki briew kiba ju phone sha ki paidbah ban kylli bniah shaphang ki ATM jong ki ki dei ki kynyhun runar kiba thmu ban lute na ki paidbah da kaba len mynleh kum ki nongtrei jong ka SBI.
U SP u la maham jur ia ki paidbah ba ki dei ban phikir bha ha ka por ba ki pyndonkam ATM katkum ki kyndon ba la ju buh da ki bank, bad ki dei ruh ban rejistar ia u nombar mobile jong ki ba kin ioh da ka SMS lada don ka jingshah sei pisa lane ki sei pisa dalade hi ruh. U la pyntip ruh ba lada ki ioh jingtip ba la don kiba sei tuh ia ka pisa jong ki ki dei ban yntip mar mar sha ki bank ba ki don account lane sha ki pulit.