Phi lah ban bein, hynrei kumno phin rat

Wat la ki langiong ki heh kyrdan (elites intellectuals) ki bein ki khoh bad pyrshang ban tan shapoh ia kino kino ki kynhun kiba trei sngewbha ban pynkyntiew ia la ka jaidbynriew, ka long pynban kumba iuh mawjam ban kiew shuh shuh sha khliar u lumbah bad ban pyni ba ki seng treimon sngewbha ruh ki lah ban leh lada kiwei ki lah. Ka long ruh kum ka jingtangon ‘nembah ia ki nongwoh daw khamtam ki langiong heh kyrdan.
Ha ka jingshim sting bad leh lut phut pathar, leh klumar, leh bymsuidniew, ka sorkar ka la kyllon ha shiteng madan jong ka thma Covid-19 bad bun na ngi ki paidbah ngi la khohnioh bad syier sa ia ka thma bam (iap thngan).

Hapdeng ka jingkyrmen, ka long kumba shat phyrnai ki kjat sngi bad ka long ka jingkyrkhu kaba khraw ia ki duk ki rangli, ki kyndoi ja kpoh naba mih pli shibun ki kynhun ia khun bad ki kynhun shimet kiba beh thong ban rap ia ka sorkar jylla. Ki don kiba bud nadien ka sorkar ban iakhun ryngkat, ki don kiba khun na shiliang madan ban tehlakam ia ka thma iap thngan bad ki don ruh kiba iakhun ha baroh ar. Bad ka jingkhublei ka iaid sha ki baroh. Halor kane, kawei na ki kynhun kaba ngi la sakhi kadei ka seng kaba peit ia ka khia ka shon ka jaidbynriew ka seng KSU.

Kum u dkhot shimet ka imlang sahlang, ngam lah khlem da iaroh ia ki kam ba bha bad ba radbah ka seng ka jaidbynriew (KSU) naduh ki kam im kam iap ka jaidbynriew haduh ki kam leh isynei, la iba rit ne iba khraw, kane ka seng ngam ju iohi ba ka kyntait ban tur shaphrang. Kum ka kyntien pyrto MAITSHAPHRANG, ngi iohi shisha ia ka jingshynrang mynsiem ki dkhot bad kiba kloi ban mait ia ka saw ka sain bad ban jam shalor. Bad ban bynrap shuh shuh, kumba ngi la sakhi ba ka khlam covid-19 kam pat kut bad wat hapdeng jong ka khlam, ka seng jong ka jaidbynriew kam ju shong thait. Katba nangiaid ki sngi, ka jingthehsei ki kam ba bha ruh ki iai kyrsoi, bad kane hi ka pyni baka seng ka don kaba bynta kaba khraw naka bynta ka jaidbynriew bad lada ngi long kiba shemphang ban pyrkhat, kan ym eh ia ngi ban lap haei ngi lah ban shaniah.na ka bynta ka lawei jong ka jaidbynriew.

Khatduh, kumba bun ki khlieh, ka jingmut jingpyrkhat ruh kyrhai sahuh bad ki nongwoh daw kiba ialeh ban tan shapoh ruh ki bun. Hynrei wat la kata ruh, ngan pynkut da i kyntien jong u babu Soso Tham, “Phi lah ban bein, hynrei kumno phin rat!” Na ka bynta ka bha ka miat, wat kynran dien bad maitshaphrang sha baroh ki riewshlur kiba nud ban mih madan khamtam ha kum kane ka por bad phikir bha ia la ka met ka phad. Khublei Shibun.

N.C. Sari
Thadlaskein, West Jaintia Hills.