Phi ki nongthohkhubor, imat phi ia ioh eiei: CEM KHADC

Shillong,23 Jylliew:
“Wat sngew eiei, phi ki nongthohkhubor ruh, phi thoh ia ki khubor kiba imat phi ia ioh eiei” ki dei ki kyntien kiba la mih na ka shyntur u CEM ka KHADC u bah Ardent Basaiawmoit uba la kren bad phai khmat sha ki nongthohkhubor shuwa ban sdang ka jingiatai ha ka ing dorbar ka KHADC, kaba la long mynta ka sngi halor ka mat jied syiem ha Malaisohmat.
Kat kum ki jing kren u bah Ardent la sngewthuh ba u shim ba dei ki kot khubor kiba la ialam bakla bad pynkhluit ia katei ka mat kaba la khluit shisha ha ka sngi sdang Dorbar ka KHADC. Kitei ki jingkynthoh u bah Ardent ia ki nongthohkhubor, ka la pynkyndit ia ki MDC kiba don hapoh Ing Dorbar, ha kaba bun na ki MDC khamtam na ka liang pyrshah ki la khmied shajrong sha ka jaka ba shong ki nongthohkhubor. Ha ka jingiakynduh bad katto katne ngut ki MDC ka liangpyrshah hadien ba la wai ka Dorbar, ki la pynpaw ka jingkyndit ban ioh sngew ia kitei ki kyntien na u CEM hapoh ing Dorbar, uba la phai khmat ban kynnoh pynban ia ki nongthohkhubor.
Katei ka jingkynthoh u CEM ka KHADC mynta ka sngi hapoh Ing Dorbar ia ki nongthohkhubor, ka dei ka sien kaba nyngkong eh ba ki nongthohkhubor kin shah kynthoh ha u khliehduh ka KHADC.