Phet seng u nongialam samla ka Congress & 22ngut ki MLA

U nongialam ba dang samla jong ka seng Congress bad uba dei uwei na ki paralok ba iajan bha bad U Rahul Gandhi, u Jyotiraditya Scindia, ula mih noh mynta ka sngi na ka seng Congress, hadien ba ula don bad katei ka seng, haduh 18 snem kynthih.

U Scindia, u phah ia ka shithi phet seng jongu sha ka Sonia Gandhi, kaba dei ka nongialam ba rangbah duh jong ka seng Congress.

Ha ryngkat ka jingphet seng jong U Scindia, ki don ruh 22ngut ki MLA, kiba la rai ban bud ia U Scindia bad kitei ki la phah ia ki shithi iehnoh kam jongki sha U Lat ka Jylla bad katei ka la buh ia ka jingeh kaba khraw ia ka sorkar jong U Kamal Nath ha Madhya Pradesh, ha kaba ka lah ban khyllem noh.

Ha shwa ba un mih noh na ka seng Congress, U Scindia, ula ia kynduh mynta ka step, ia U Narendra Modi, myntri rangbahduh, ha ka jingialam jong U Amit Shah, myntri kam poh iing ka sorkar India.

Ha ka shithi phet seng jongu, U Scindia, u iathuh ba um lah satia ban trei na bynta ka Ri, ha ka jingdon jongu ha katei ka seng bad ula ong shuh shuh ba ula sngew donkam ba sdang biang ia ka jingtrei jongu, ha kawei pat ka lynti iaid shakhmat.