Phet seng 4000 ngut ki dkhot ka HSPDP Mairang

Shillong, 17 Iaiong: Kumba 4000 ngut ki dkhot ka HSPDP Mairang Konstitwensi ki la phet noh na katei ka seng, iathuh u bah Etelan Myrthong Chairman ka HSPDP Mairang Unit haba ia kren bad ki nongthoh khubor ha ka sngi saitjaiñ jong ka taiew. U bah Myrthong u la kynnoh ba ka dawbah ba ki briew ka HSPDP ki la phet noh na katei ka seng ka dei namar ka jingleh donbor u President rangbah jong ka u bah Ardent Miller Basaiawmoit.
Kawei na ki daw kaba la pynmong ia ka rukom treikam u bah Ardent ka dei namar ba kam shym la don kano kano ka jingiakren ne ka jing phylliew jingmut bad ki nongialam katei ka seng na Mairang shuwa ban pynduh pyndam noh ia ka Mairang Unit hynrei kynsan kynsan la shu pynbna beit ha ka jingialang kaba la long ha ka 13 tarik mynta u bnai ha kaba u bah Ardent u la pynbna ia ka kyrteng ki nongkitkam thymmai ka Party, bad katei ka dei ka jingpynkheiñ ia ka riti synshar katei ka seng,ong u bah Myrthong.
“La shu pynbor ia ki nongtrei ka Party kiba wan jingialang ba ki dei ban pdiang ia katei ka rai jong ka Central Executive Committee” ong u bah Myrthong uba la ong ba u bah Ardent u la ong ‘Lada don mano mano ki bym pdiang ia katei ka rai ki long kiba laitluid ban mih noh na ka seng”. Ula ong ruh ba ki dkhot jong ka HSPDP ki la sngewsih kthang naba ym shym la shah ia ki ban kren tang shi kyntien ruh bad ba kin pan jingpynshai ia ka rai kaba u bah Ardent u la shim. Kawei pat ka daw kaba ki nongialam ka HSPDP na Mairang ki la kdew ha katei ka jingiakynduh bad ki nongthohkhubor ka long ba ki la kynnoh u President Rangbah katei ka seng um shym la ia phylliew jingmut ne ia kren bniah iano yn pynieng na Mairang Konstitwensi ha ka elekshon MLA ka ban wan hynrei u la shim beit beit ia ka rai tang nalade hi. “U bah Ardent u kwah ban pyniakhun da u bah Alexander Kharsyntiew,uba ka Party kam sngewtynnad hynrei ka Party ka kwah da u bah Councellor Sing Wahlang” ong biang u bah Myrthong. Lah ban kdew ba u bah Kharsyntiew u dei uba la shah jied thymmai kum u President jong ka HSPDPMairang Konstitwensi ryngkat 6 ngut ki nongkitkam. “ U bah Kharsyntiew u dei u nongialam barim ka United Democratic Party (UDP) , u la wan pyniasoh bad ka HSPDP dang shen, hynrei la bynshet ha u ia ka kam President bad kumjuh ruh kum u kyrtong u ban sa ia khun na katei ka seng ha ka elekshon ka ban wan, kiwei ruh ki 6 ngut ki nongkitkam thymmai ki dei kiba wan ia soh dang shen” ong shuh shuh u bah Myrthong.