Phet sa ka kompeni kaba tih surok, naduh Umsyiem sha Tamabil

Shillong:Hadien ba la mih ka jingïakren kaba khluit ha ki rynsan social media bad ka jingsah lyngngoh kiba bun halor ka jingiehnoh jong ka kompeni SS Infrazone ban tih ïa ka sorkar Shillong-Dawki jong ka bynta kaba nyng kong, mynta u Rupang u la ïoh ruh sa ka jingtip kaba thikna ba sa kawei pat ka kompeni ba dei tih ïa ka surok Shillong-Tamabil(Dawki) na ki bynta ka Umsyiem haduh Tamabil ba ka la iehnoh ïa kane ka jingtrei kaba ka ïoh.

Kat kum ka jingtip kaba thikna kaba u Rupang u ïoh la ong ba kane ka bynta ba san ne package 5 kaba ka kompeni Niraj Cement Structurals Limited, kaba na Umsyiem sha Tamabil Dawki ka lynter jong ka surok ka long kumba 7.9 KM eiei.

Haba u Rupang u pyrshang ban wad jingtip shuh shuh ïa ki daw kiba kane ka kompeni, ka iehnoh ïa ka jingtrei wat hadien ba ka la jop ïa ka tender u Rupang u la lap ba ka daw hi kaba kane ka kompeni ka phet noh ka dei na ki jyrwit jyrwat kiba mih na ka jingbym lah ka sorkar jylla bad ka DC ban pynïoh ïa ka jaka ban ïaid kane ka surok.
Kat kum ka tyllong jingtip kaba thikna la ong ba kumba long mynta ki kyndon kiba kiwei ki tnad ka sorkar jylla ki dei ban pyndep ha shuwa ban ïoh pyntrei ïa kane ka surok la shuh pynsahteng la bun bun snem kum ka jingkhet noh ïa ki dieng da ka tnad khlaw ha ki jaka ba dei ban ïaid ka surok bad ka jingjyrwit jyrwat jong ka jingïoh khyndew ban pynïaid ïa kane ka surok.

Shuh shuh haba u Rupang u pyrshang ban ïakren bad u Genral Manager jong ka National Highway Infrastructure Development Corporation Limited ban wad jingtip kaba thikna na ka liang u General Manager jong kane ka corporation u la ïathuh ba ka dei ka jingshisha bad u la ïathuh ruh ba shen ka tnad kan khot tender thymmai, ynda kine ki jyrwit jyrwat la lah ban weng lut.
Shuh shuh u la ong ruh ba kum ki kompeni kim lah satia ban shuwan sah kai shane khlem da ïoh ban pyntrei ïa ka kam kaba ki dei ban pyndep namar ka jaka ba ki ïoh ban trei ruh ka long tang kumba 0.5 KM kaba ka sorkar jylla ka la ïoh ban ai sha ka sorkar pdeng ban pynïaid sha khmat ïa ka jingtih ïa kane ka surok.