Phet krad U Sohan na lum Durama na ka Hill Storm, kam ki pulit

Shilllong, 03 Iaiong:
Ki pulit ka jylla ki la kam ba u rangbah shipai shu kam ka GNLA u Sohan D Shira u la phet krad noh na jaka sah jongu ha u lum Durama namar ka jingpynjur kyndang ki pulit da ka Operation Hill Storm-III ha baroh ka bynta ka Garo Hills.
Wat la ki pulit kim kwah ban kren eiei shaphang u Sohan, la sngewthuh ba ki la pynlong ia ka jingpynjur ia ka jingkhynra ban thwet ia u Sohan, uba lah ban kynriah sha kiwei ki jaka wat ha Bangladesh namar ka jingkynduh jingeh na ka jingkhynra ki pulit.
Ki pulit ki la kam ba ka jingkhynra da ka Operation Hill Storm-III ha Garo Hills ka long kaba jop ha kaba ki la lah ban kurup ia kiba bun bah ki tiar ialeh ka GNLA, ka jingioh siat iap ia ki katto katne ki dkhot ehrang kane ka seng ha kine ki sngi ba la dep.
Kham mynshwa, ki pulit ki la ioh kurup ia ki bom IED haduh 70 tylli na East Garo Hills bad na North Garo Hills bad ruh na ki bynta ka West Khasi Hills.La iathuh ba namar ka jingpynjur jong ki pulit ban kyndang, la don ka jingkhih jingmut na ki dkhot ka GNLA ban wan pyndem wait noh.