Phet krad ka kompeni surok, ba slem kynriah nar um ka PHE

Shilong:Hadien ba ka kompeni ban tih pynheh ïa ka surok na Rilbong ha Mylliem kaba dei shi lyngkhot jong ka surok Shillong-Dawki ka la iehnoh ïa ka jingtrei jong ka, na ka liang u Rupang u la pyrshang ban ïoh jingtip ïa ka daw tynrai kaba pynlong ïa kane ka kompeni ban iehnoh ban pyntrei ïa kane ka kam na ka ophis jong u General Mannager(Project) jong ka National Highway Infrastructure Development Corporation Limited (NHID CL) Project Management Unit kaba don Mylliem.

Haba kren bad uwei u ophisar, u bym kwah ban pynpaw kyrteng, u la ïathuh ba ka daw ba kongsan ba kane ka kompeni SS Infrazone Pvt Ltd ka ieh noh ban pyntrei ïa kane ka surok ka dei beit na ka daw ba kam ïoh pyntrei shuh ïa ka jingtrei na ka daw ka jingslem palat ban pynkynriah bad ban tep ïa ki pipe um ha shi lynter ka surok ba ïaid ki pipe um kiban pynpoi um sha Nongbah Shillong.

Shuh shuh u Rupang u la ïoh jingtip ba kine ki pipe kiba ka tnad PHE ka dei ban tep ne pynkynriah la dei ban pyndep naduh u snem 2020 namar na ka liang kane ka tnad jong ka sorkar India ka la dep ruh ban siew bai lut ksan sha ka tnad PHE jong ka sorkar jylla kaba kot kumba 78 klur eiei ha u Lber 2020. Haba la wad pat ïa ka lynter kaba kine ki pipe ki dei ban pynkynriah ne tep hapoh khyndew ha shi lynter ka surok na ka liang u Rupang u la lap ba kine ki pipe ki dei ban ïaid ka lynter (total length) kan duna ïa ka 6 KM eiei.
Shuh shuh kat kum ka jingtip kaba u Rupang u ïoh la lap ba ïa ka surok na Shillong sha Dawki la phiah ha ki san bynta ne five package bad kane ka bynta ba ka SS Infrazone ka ieh noh ka dei bynta ba nyngkong ne first package jong kane ka surok kaba ka lynter jong ka ka long kumba 11.6 KM.

U Rupang u la lap ruh ba ba ïa kitei ki san bynta dang tang ar tylli kiba ka jingtrei ka ïaid shakmat katba kiwei kiwei pat ka dang sahngeh na ka daw ka jingbym pat lah pynïoh jaka ka DC bad ka sorkar jylla ban ïaid kane ka surok. Kat kum ka jingtip kaba la ïoh la lap ba kaba la ïaid shakhamat dei tang ka package 2 kaba jngai kumba 26 .54 KM bad ka package 4 kaba ka jinglynter jong ka ka long kumba 17.77 KM.

Haba la pyrshang ban wad jingtip pat la na ka liang ka tnad kan pynshitom ne em ïa kane ka kompeni kaba la iehnoh ban pyntrei ïa kane ka surok la lap ba ka sorkar kan ym lah ban leh eiei namar ka jingiehnoh ka dei beit na ka daw ka jingbym lah ban pynïoh ïa ki jaka ban ïaid ka surok ne ka jingbym lah pyndep ïa ki jingtrei kiba dei ban leh ha shuwa ban trei ïa kane ka surok.