Phet krad ar ngut ki myntri sorkar ha Assam, ba tur ki paidbah ba iakhih pyrshah CAB

Guwahati: U Rameswar Teli, myntri ka sorkar India, ula shah khang lynti mynta ka sngi ha Naharkatia, kaba ha Upper Assam jong ka Dibrugarh District, ha kito kiba iakhih ban pyrshah ia ka ain CAB.

U Teli, uba dei u myntri ka sorkar India, ula shah lymbub ha ki dkhot jong ka All Assam Students’ Union (AASU) lem bad kiwei de ki kynhun sengbhalang. Kitei ki la khang lynti bad ki da pyrta ruh “Khie leit noh” bad ki pynher ruh da ki lama iong. U Teli, u leit ban shim bynta ha ka jing rakhe ia ka Jaipur Rain Forest. Hadien ba U Teli, ula sngewthuh ba um don jingshngain ban leit sha katei ka jaka, ula phet krad noh lem bad ki pulit kiba pahara ia u. Kham mynshwa, la iathuh ba mynta hi ka sngi, U Phani Bhushan Choudhury, uba dei u myntri jong ka sorkar Assam, uba dei na ka seng AGP, ula dei ban phet krad na ka jingialang ha Manikpur jong ka Lower Assam, Bongaigaon District. U Choudhury, uba dei u myntri ka tnat sam bam jong ka sorkar Assam, u leit sha katei ka jaka ban pynlong jingialang jong ka seng AGP.