Shillong: La ioh khubor, ba ki don kumba 600ngut ki nongshong shnong na Malangkona jong ka West Khasi Hills, kiba la phet shnong shnong, namar ba ki pulit jong ka Assam, ki byrngem ban kem naphang ia kitei ki briew.
Ki shnong kiba ki la ktah na katei ka jingtieng koh tympan ki long ka Amagaon, Salpara, Malangkhasi, Huwapara, Sildubi, Malangjoypur bad kiwei de ki shnong kiba marjan.
La iathuh ba 575ngut ki briew, kiba na ki 77 tylli ki longiing, ki leit shong rieh tngen ialade ha ka iingmane jong ka Balang Katholik ha Malangkona, namar ka jingsyier mynsiem.
Ki paidbah jong katei ka thain ki pyrshah ban trei ia ka surok, da ka sorkar Assam ban leit sha ka kshaid jong ka Chongadre bad ki pulit Assam, ki la leit poi sha katei ka shnong, ha kaba ki la shoh la dat ia shibun ki briew kiba don ha katei ka shnong, na ka daw jong katei ka jing khanglad jongki.
Ka jingwad jingtip, ka dang iaid ban lum shuh shuh ia ki jingjia kiba iadei bad katei ka kam.